Sabiq əmək və əhalinin sosial müdafiəsi naziri Səlim Müslümovun cinayət işi üzrə məhkəmə araşdırması davam etdirilib.
Elchi.az xəbər verir ki, bu gün Bakı Ağır Cinayətlər Məhkəməsində hakim Faiq Qəniyevin sədrliyi ilə keçirilən iclasa bir şahid gəlib. Prosesdə Əmək və Əhalinin Sosial Müdafiəsi Nazirliyinin Daxili Nəzarət şöbəsində məsləhətçi işləmiş Anar Bayramov ifadə verib. Şahid məhkəmədəki ifadəsində bir neçə rayonda yoxlamalar keçirdiyini, aşkar olunmuş nöqsanlar barədə işlədiyi şöbənin rəis müavini Nizami Xanlarova məlumat verdiyini deyib.
Anar Bayramov işində nöqsan aşkar olunmuş şəxslərdən rüşvət alınması ilə bağlı epizod üzrə danışmayıb.
Bundan sonra hakim Faiq Qəniyev sərbəst ifadə vermək üçün Səlim Müslümova söz verib.Sabiq nazir geniş ifadə vermək istəməyib. O, konkret olaraq ibtidai istintaq dövründə verdiyi bütün ifadələri təsdiq etdiyini deyib.
Məhkəmədə iş üzrə şahid qismində tanınmış 334 nəfərdən 70 faizinin dindirildiyi elan olunub.
Müdafiə tərəfi dindirilmiş şahidlərin kifayət etdiyini, digərlərinin əvvəlki ifadələrinin elan olunmuş hesab edilməsini istəyiblər.
Prosesə sədrlik edən hakim qeyd edib ki, cinayət işində adı keçən bəzi şirkətlər iş görən zaman mənimsəmə hallarına yol veriblər. Bununla bağlı istintaq orqanı tərəfindən ayrıca iş açılıb. Həmin istintaq zamanı bu günə qədər dövlətə dəymiş ziyanın 1 milyon 500 min manat təşkil edən hissəsi ödənilib. Bundan əlavə, “Göyqurşağı” MMM tərəfindən aparılan işlər zamanı dövlətə dəymiş 1 milyon 577 min manatın da ödənildiyi elan olunub.
Hakim istintaqın yekunlaşdırılması istiqamətində fikirlərini bildirmək üçün dövlət ittihamçısına söz verib.
Prokuror məhkəmədən vaxt istəyib.
Hakim dövlət ittihamçısı və müdafiə tərəfinə son təkliflərini hazırlamaq üçün vaxt verib.
Tərəflər hazır olarsa, proses dekabrın 30-da davam etdiriləcək.
Səlim Müslümov 2021-ci ildə Dövlət Təhlükəsizliyi Xidməti (DTX) tərəfindən həbs olunub. Cinayət Məcəlləsinin 179.4 ( xüsusilə külli miqdarda ziyan vurmaqla mənimsəmə və israf etmə), 308.2 (ağır nəticələrə səbəb olan vəzifə səlahiyyətlərindən sui-istifadə), 311.3.2-ci və 311.3.3-cü (təkrar külli miqdarda rüşvət alma) maddələri ilə ittiham olunur.
Sabiq nazir 13 ay həbsdə qaldıqdan sonra səhhətində yaranan problemlə bağlı ev dustaqlığına buraxılıb.
İbtidai istintaq dövründə cinayət işi üzrə dövlətə dəymiş 27 milyon manat ziyanının 20 milyonunu ödənib.
Son şərhlər