Daxili işlər naziri Ramil Usubov polis orqanlarında işləmək istəyən şəxslərin qəbulunu keçirəcək.
Daxili İşlər Nazirliyinin mətbuat xidmətindən verilən məlumata görə, Ramil Usubov tərəfindən fevralın 28-də Şirvan şəhərində keçiriləcək vətəndaşların qəbulu zamanı polisin sıravi və kiçik rəis heyəti vəzifələrində xidmət etmək arzusunda olan, Şirvan şəhər, Sabirabad, Salyan, Neftçala, Hacıqabul, Biləsuvar, Cəbrayıl, İmişli, Zərdab, Saatlı rayon sakinlərindən yaşı 20-dən az 30-dan çox olmayan şəxsləri qəbul edəcək.
Qəbulda Azərbaycan Respublikasının Silahlı Qüvvələrində həqiqi hərbi xidmət müddətini tam başa vurmuş (qadınlar istisna olmaqla), boy ölçüsü 175 sm-dən yuxarı (qadınlar üçün 170 sm); düzgün bədən quruluşlu və idman cüssəli, tam orta təhsilli, yol-patrul xidməti inspektoru vəzifələrinə əlavə olaraq avtomobil nəqliyyatına aid olan orta-ixtisas və ya ali təhsilli, 3 ildən az olmayan sürücülük təcrübəsi olan, kompüterdən istifadə etməyi bacaran şəxslər iştirak edə bilər.
