“İran fars rejimi ətrafındakı halqa daraldıqca, rejim ətrafına qəzəb püskürməyi artırır. İran iqtisadiyyatı ağır günlər yaşayır. İran milli pulu “real” yerlərdə sürünürkən, inflyasiya dağ başına qalxır. İranın 85-90milyon əhalisi isə daha da kasıblaşır”.
Bu fikirləri Elchi.az-a açıqlamasında politoloq Azər Qasımov söyləyib.
Analitik qeyd edib ki, 1979-cu il inqilabla hakimiyyətə Qərb gücləri tərəfindən gətirilən molla rejimi hakimiyyəti ələ aldıqdan bu günə kimi ətrafı ilə müharibə vəziyyətindədir:
“8 il İraqla qanlı müharibə edən İran, müdafiə xəttini ölkədən kənarda tutmaq üçün Qərbin İraqı işğal etməsinə baxmayaraq İrakqda, Suriyada, Yaxın Şərqdə, Ərəb yarmadasında terrorçu, separat qruplar yaradıb, onlara dəstək verməklə İran xalqının pulunu onlara xərcləyir. İran demokratik bir ölkə olmadığı üçün bunu xalqına sormur. Bu da xalq arasında narazılıqları getdikcə artırır. İran milli pulu rəsmi olaraq 1 dollar 43 min real olduğu halda, əslində 300 mindən yuxarı qiymətə qara bazarda satılır”.
A.Qasımov vurğulayıb ki, Qərbin nüvə məsələsinə görə İran rejiminə tətbiq etdiyi sanksiyalar əslində simvolik xarakter daşıyır:
“İran nüvə enerjisi və sonda nüvə silahı üçün zənginləşdirilmiş uranın faizini lazım olan həddə çatdırmaq üzrədir. İran təbii ki, nüvə silahına Qərbdən qorunmaq üçün yox, ərəb və türk dünyasından qorunmaq üçün sahib olmaq istəyirlər, çünki İran fars rejimi yarandığı gündən bu günə kimi nə xristian dünyası ilə, nə də İsraillə bir dəfə də olsun açıq konfliktə belə girməyib. Rejimin işi ancaq ərəb və türk dünyası ilə mübarizə aparmaq olub.
İran bu sanksiyalara rəğmən neftini Çinə satır. Çin bu nefti çox ucuz qiymətə İrandan alır. Çin 400milyard dollar İranın iqtisadiyyatına pul qoymaq adı altında aldığı neftin pulunu öncədən verir.
Yaxın gələcəkdə İran rejiminin sonunun başlanğıcı olacağı mütləqdir. Geosiyasi baxımdan İran rejimi Qərbli güclər üçün öz rolunu oynayıb. Artıq dünya təkqutblü hakimiyyətin güclənməsi istiqamətində inkişaf edir. Yenidən qurulan dünya düzənində İran, Rusiya kimi konflikt yaradan ölkələrə yer olmayacaq. Onların dağılması, yerlərində isə yeni dövlətlərin yaranması prosesinə artıq start verildiyi aydın görünür”.
Yeganə