Dövlətimizin inkişafı və korrupsiyanın azaldılması üçün siyasi müxalifətə çevrilməyən ictimai nəzarətin olması olduqca vacibdir.

Axar.az xəbər verir ki, bu sözləri Prezident İlham Əliyevin ictimai nəzarətin gücləndirilməsi barədə çağırışlarını şərh edən politoloq Fərhad Mehdiyev deyib. O, ölkə başçısının son çıxışlarında ictimai nəzarətin əhəmiyyətini xüsusilə vurğuladığına diqqət çəkib:

“İctimai nəzarət – siyasi müxalifət demək deyildir. Bu məsələ xəttin hər iki ucunda (hökumət-cəmiyyət) həmişə düzgün başa düşülmür. Dövlətin inkişafı və korrupsiyanın azaldılması üçün siyasi müxalifətə çevrilməyən ictimai nəzarətin olması olduqca vacibdir. Bu məsələdə tənqid sırasında istifadə olunan dil olduqca mühümdür. Yəni ağır ittihamlar səsləndirmək yerinə, konstruktiv, təklif formasında mülahizə bildirilməlidir.

Tənqid ağır olsa da, əks-reaksiyanın 2 səbəbi var: birincisi, Şərq xalqında tənqidə dözümsüzlük var, ona görə də fikirlər ünvanına çatmır. İkincisi, ağır tənqid səsləndirildikdə, bu, siyasi müxalifətə bənzəyir və tənqidçi ümumiyyətlə tərəf müqabili kimi qəbul olunmur və onun fikirləri nəzərə alınmır. Bu nöqteyi-nəzərdən də əsas məqsədimiz prezidentin idarəsi altında müasir, mürəffəh, müstəqil və mədəni Azərbaycan formalaşdırmaqdır”.

Politoloq hesab edir ki, cəmiyyətdə olan problemlər araşdırılmalı, qanunvericiliyin təmin etdiyi təklif və şikayət yollarından istifadə edilməlidir:

“Bunu bir-iki nəfər yox, bir çox insan etməlidir. Çünki şikayət və ya narazılıq ictimai rəy formasını aldıqda idarəçilər ona mütləq reaksiya verir. Sadəcə təklif və şikayətləri ictimai halda, obyektiv və qərəzsiz formada, narahatlıq və qıcıq doğurmayacaq formada bildirməliyik. İctimai nəzarət məsələsində prezidentə yardımcı olmalıyıq”.