Dünyada baş verən hadisələrə dərhal sanksiyalarla reaksiya verildiyi halda, 30 illik işğal dövründə Ermənistana qarşı heç bir addımın atılmaması beynəlxalq müstəvidə ikili standartların ən bariz nümunəsidir.
Elchi.az xəbər verir ki, bunu Prezident İlham Əliyev Bakıda keçirilən İslam İnkişaf Bankı Qrupunun 2026-cı il üzrə İllik Toplantılarının açılış mərasimində deyib.
Dünya siyasətindəki mövcud sanksiya mexanizmlərinə toxunan dövlət başçısı bəyan edilən qondarma dəyərlərlə real siyasət arasındakı ziddiyyəti kəskin tənqid edib:
“Bu gün biz hər gün sanksiyalar haqqında eşidirik. Elə bir şey olan kimi, dərhal sanksiyalar tətbiq olunur. Lakin Ermənistana qarşı heç kim sanksiya tətbiq etmədi. Əgər Ermənistana beynəlxalq hüququ pozduğuna, suveren ölkənin ərazisini işğal etdiyinə, müharibə cinayətləri törətdiyinə görə vaxtında sanksiya tətbiq olunsaydı, iki ölkə arasındakı münaqişə bu qədər uzun çəkməzdi”.
Prezident İlham Əliyev qeyd edib ki, münaqişənin 30 ilə yaxın uzanmasının səbəbi vasitəçilərin qərəzli mövqeyi olub. O, danışıqlar prosesini idarə edən qüvvələrin əsl niyyətini açıqlayıb:
“Bu 30 il ərzində danışıqlar üçün qondarma çətir təmin edənlərin yalnız bir məqsədi olan çoxsaylı faydasız, sonsuz, mənasız danışıqlar raundları oldu. Həmin məqsəd torpaqlarımızı əbədi olaraq Ermənistanın işğalı altında saxlamaq idi. Sülhə və ərazilərimizin azad edilməsinə nail olmaq mandatı olanların gizli istəyi bu idi”.
Dövlət başçısı çıxışında ATƏT-in Minsk qrupunun həmsədrləri olan BMT Təhlükəsizlik Şurasının üç daimi üzvünün — Fransa, Rusiya və ABŞ-ın fəaliyyətsizliyinin təsadüfi olmadığını vurğulayıb:
“Təsəvvür edə bilirsinizmi ki, bu nəhəng ölkələr Ermənistanı Azərbaycan ərazilərini azad etməyə məcbur edə bilmirdilər? Xeyr, əlbəttə ki, yox. Onlar sadəcə bunu istəmirdilər. Onlar torpaqlarımızın Ermənistanın işğalı altında qalmasını istəyirdilər və bu, onların birgə qərarı idi”.
