Vaqif Əsədov: “Cərimə məbləğinin yüksək olması nizam-intizama təsir göstərəcək”; Ərşad Hüseynov: “Hər halda, həyəcan təbili çalmaq üçün əsas var”
Bir neçə gündür ki, ictimaiyyətdə yol hərəkəti qaydalarını pozan piyadaların 20 manat deyil, 100 manat cərimələnəcəkləri ilə bağlı məsələ geniş müzakirə obyektinə çevrilib. İnsanlar öz narazılıqlarını bildirərək, cərimələrin bu qədər artırılmasının doğru olmadığını söyləyirlər.
Öncə qeyd edək ki, ötən ilin sonlarında yollardakı dəmir və beton arakəsmələrin üzərindən keçib yolun hərəkət hissəsinə çıxan piyadaların həbs olunması ilə bağlı Milli Məclisə göndərilən qanun layihəsi dəyişdirilib. Belə ki, layihənin ilkin variantında beton və dəmir arakəsmələrin üzərindən aşıb, yolu keçənlərin 15 günədək inzibati həbs cəzası ilə cəzalandırılması təklif olunurdu. Lakin bu təklif məqbul sayılmayıb. Təklif olunub ki, yuxarıda qeyd etdiyimiz qaydaları pozan piyadalar 100 manat cərimələnsinlər. Layihə Milli Məclisə göndərilib və yaz sessiyasında müzakirə olunacaq.
Məsələ ilə bağlı Baş Dövlət Yol Polis İdarəsinin İctimaiyyətlə əlaqələr şöbəsinin rəisi Kamran Əliyev də açıqlama verib. Belə ki, K. Əliyev azvision.az saytına açıqlamasında bildirib ki, hər bir piyada üçün cərimənin artırılmasından söhbət getmir.
Qurum rəsmisi bildirib ki, cərimələrin artırılması beton və dəmir maneələrin aşılması ilə yolun hərəkət hissəsinə çıxan piyadalar üçün nəzərdə tutulub: “Digər hallarda isə cərimə məbləği 20 manat olaraq qalır. Adıçəkilən cərimə artımı ilə bağlı müzakirələr olacaq. Son nəticədə hansı qərar qəbul olunacaqsa, yol hərəkəti qaydalarını pozan piyadalara qarşı bizim əməkdaşlar tərəfindən həmin cərimə sanksiyası tətbiq olunacaq”.
Mövzu ilə bağlı “Yeni Müsavat”a danışan Bakı Şəhər Dövlət Yol Polisi İdarəsinin ictimaiyyətlə əlaqələr şöbəsinin rəisi Vaqif Əsədov bildirdi ki, piyadalarla bağlı cərimələrin sərtləşdirilməsi nizam-intizamın qaldırılmasına təsir edəcək: “Vətəndaş, sürücü, yol polisi və Bakı şəhər sakini olaraq bildirirəm ki, bəli, piyadalarla əlaqəli tətbiq edilən cərimə məbləğinin daha yüksək olması nizam-intizamın qaldırılmasına təsir göstərəcək. Bu şərtlə ki, cərimənin ödənilmə mexanizmi də düzgün həyata keçirilsin. 2016-cı ildə piyada vurma halları 60 faizə qalxıb. Bu, çox ciddi rəqəmdir. Özlüyümdə bunun nə üçün belə qalxmasını təhlil edirəm və qənaətə gəlirəm ki, 50 faiz piyada tərəfindən cərimə məbləğinin ödənilməməsi, görünür, hadisələrin çoxalmasına təsir göstərir. Ona görə razıyam ki, piyadalarla əlaqəli törədilən xətalarla bağlı maksimum cərimələr tətbiq olunsun və onun ödənilməsi mexanizmi sərtləşdirilsin. Piyada bunu ödəməsə, ölkədən çıxa, bankdan kredit götürə bilməsin. Bank nəzərə alsın ki, cəriməni ödəyə bilməyən vətəndaş krediti necə qaytaracaq. Yaxud da digər sosial müavinətlərdən məhrum edilsin, işləyirsə, onun maaşından, tələbədirsə, təqaüdündən bu cərimə məbləği tutulsun. İşləmirsə, icra orqanları, məhkəmələr bu pulu ondan alsın. Əgər belə olarsa, sizi əmin edirəm ki, hadisələr minimuma enəcək.”
Müsahibimizin sözlərinə görə, piyadalarda arxayınçılıq yaranıb: “Düşünürlər ki, cəriməni ödəmədik və bizə heç nə edən olmadı. Belə deyil axı. Artıq siyahı da hazırlanıb və yaşayış yerlərinə, icra orqanlarına, təhsil müəssisələrinə biz lazımi informasiyanı göndərmişik. Çox güman ki, cərimələrin ödənilməsi məsələsi də baş tutacaq. Nəticədə həm də nizam-intizam yüksələcək. Son illər mütəmadi olaraq ”Yol hərəkəti haqqında” Qanuna, İnzibati Xətalar Məcəlləsinə edilən əlavə və dəyişikliklər, tətbiq edilən yüksək məbləğdə cərimələr, ən azından nizam-intizamı yüksəldib, mədəniyyəti formalaşdırıb. Misal da deyə bilərəm ki, sərxoş vəziyyətdə avtomobilin idarə edilməsi ilə bağlı yüksək məbləğdə cərimənin tətbiqi problemi həll edib. Eyni zamanda bu xüsusda təhlükəsizlik kəmərinin bağlanmaması məsələsini də qeyd edə bilərik. Sürət həddi ilə bağlı 4 formada cəza var. Təhlilə nəzər saldıqda görürük ki, bu istiqamət üzrə də müsbətə doğru dəyişiklik var. 2016-cı ildə sürət həddinin aşılması səbəbindən Bakı şəhəri üzrə baş verən yol nəqliyyat hadisələri 37 faizə enib. 2015-ci ildə bu, 46 faiz idi. Bu formada təhlil aparan zaman görürəm ki, piyadalarla bağlı cərimələrin sərtləşdirilməsi ilə eyni zamanda onların ödənilməsi mexanizmi də öz həllini tapmalıdır. Adında cərimə borcu olanlara heç bir imtiyaz verilməməlidir”.
Ekspert Ərşad Hüseynov isə yaşayış məntəqələrində piyada vurma hallarının daha çox olmasına diqqət yönəltdi: “Ölçü statistikasına baxdıqda görə bilərik ki, ölkə üzrə cinayət xarakterli yol nəqliyyat hadisələrinin 40 faizini, Bakıda isə 50 faizini piyada vurma hadisələri təşkil edir. Son illər isə bu rəqəm, 60 faizə yaxınlaşıb. Hər halda, bu, həyəcan təbili çalmaq üçün əsasdır. Biz bir piyada olaraq çox intizamsızıq. Deyilən cərimənin artımı da hesab edirəm ki, müəyyən psixoloji təsir göstərəcək. İnsanlar düşünəcəklər ki, 100 manat cərimələnə bilərlər. Bütün qayda pozan piyadalar üçün cərimələr artırılmayacaq. Müzakirə edilən qaydalara görə, yolda dəmir və ya beton sədd varsa, onu aşan piyadalar 100 manat cərimələnəcək. İdeya bundan ibarətdir. Adi küçələrdə, prospektlərdə piyadaların cəriməsi olduğu kimi qalır. Görək Milli Məclis bu məsələyə necə yanaşacaq. Bir daha qeyd edirəm ki, yalnız yüksək sürətli yollarda cərimələrin artırılması nəzərdə tutulur”.
Son şərhlər