İran prezidenti Məsud Pezeşkian və Venesuela prezidenti Nikolas Maduro ABŞ-ın Venesuelaya qarşı hədələrindən sonra yaranmış vəziyyəti müzakirə ediblər.
Elchi.az xəbər verir ki, İran Rəyasət Heyətindən verilən yazılı açıqlamaya görə, Pezeşkian və Maduro arasında telefon danışığı olub.
İki lider ABŞ-ın Venesuelaya qarşı təhdidlərindən sonra regional və beynəlxalq hadisələri, eləcə də ölkələrinin xüsusilə ABŞ-ın regiondakı siyasətləri və inkişafları çərçivəsində üzləşdiyi problemləri müzakirə ediblər.
Venesuela prezidenti Maduro ölkəsindəki milli birlik və həmrəyliyin vacibliyini vurğulayaraq, hökumət, xalq və silahlı qüvvələr arasındakı harmoniyanın Venesuelanı bütün təhdidlərə qarşı güclü etdiyini bildirib.
ABŞ-ın Venesuelaya qarşı “media və psixoloji əməliyyatları”na toxunan Maduro, “ABŞ, hətta öz ictimaiyyəti tərəfindən də qəbul edilməyən uydurma və yalançı bir hekayə yaratmaqla Venesuelanın imicini məhv etməyə çalışır” deyib. Maduro ölkəsinin bütün potensial təhdidlərə hazır olduğunu bildirərək, “Biz tam sülh içindəyik, lakin tam qətiyyət və hazırlıqla istənilən potensial təhlükəyə qarşı çıxacağıq. Ölkəni müdafiə etmək çağırışına cavab olaraq 8 milyondan çox venesuelalının mövcudluğu millətimizin milli ruhu və qətiyyətinin göstəricisidir” dedi.
Maduro İranın Venesuelaya dəstəyinə görə minnətdarlığını ifadə edib və iki ölkənin əməkdaşlığını daha da dərinləşdirmək əzmində olduğunu vurğulayıb.
İran prezidenti Pezeşkian da İranın Venesuelanın ərazi bütövlüyünü və milli birliyini dəstəklədiyini bəyan edərək, ABŞ-ın birtərəfli hərəkətlərinin beynəlxalq hüquq və prinsiplərlə bir araya sığmadığını bildirib.
Pezeşkian ABŞ-ın İrana qarşı siyasətlərinə toxunaraq, “Təəssüf ki, amerikalılar uzun illərdir ki, İrana qarşı hər cür təhdid və təzyiqlərdən istifadə edərək, bu yalan təbliğat və həqiqətə uyğun olmayan rəvayətlərə arxalanıblar. Bu, onlar üçün müəyyən edilmiş beynəlxalq hüquq və prinsipləri pozmaq üçün bir bəhanəyə çevrilib” deyib. Pezeşkian İran təcrübəsinin milli birlik və həmrəyliyin xarici müdaxiləyə qarşı ən mühüm güc mənbəyi olduğunu nümayiş etdirdiyini bildirərək, Venesuelanın da bu birliyə sahib olduğunu və bu birliyə sahib olduğu halda heç bir xarici qüvvənin ölkəyə zərər verə bilməyəcəyini qeyd edib. Pezeşkian Maduroya dost və müttəfiq hesab etdiyi Venesuela ilə əməkdaşlığı genişləndirməyə hazır olduqlarını çatdırıb.
Şayəstə Hüseynova
