Qüdrət Həsənquliyev: “Biz, Bütöv Azərbaycanın cəmi 20 faizini təşkil edirik”
“Bu günlərdə Azərbaycan Respublikasının Prezidenti İranın Azərbaycana qarşı düşmənçilik siyasətini pislədi. Bəyan elədi ki, biz cənubda yaşayan soydaşlarımızın hüquqlarını qoruyacağıq”. Elchi.az xəbər verir ki, bu fikirləri Bütöv Azərbaycan Xalq Cəbhəsi Partiyasının (BAXCP) sədri, parlamentin hüquq siyasəti və dövlət quruculuğu komitəsinin sədr müavini Qüdrət Həsənquliyev Milli Məclisin plenar iclasında çıxışı zamanı deyib. Millət vəkili əlavə edib ki, bundan sonra İranın Azərbaycandakı səfiri İranın bayrağının üzərinə Azərbaycan Respublikası Prezidentinin dəmir yumruğunu qoyaraq sosial şəbəkədə yaydı: “Bu nə deməkdir? Səfir şovinist, fars-molla rejiminin adi hüquqlardan məhrum etdiyi cənubi azərbaycanlıdır. O işarələrlə deyir ki, Ermənistandan sonra Prezidentin bir yumruğu da, bizi heç sayan, kölə etmiş, milli mənliyimizə həqarət edən fars-molla rejiminin başına dəyməlidir”.
Millət vəkili daha sonra əlavə edib: “Mətbuatdan oxudum ki, ABŞ-ın analitik mərkəzləri İrandakı vəziyyəti təhlil ediblər və İranın İnqilab Keşikçiləri Korpusu bir videoçarx hazırlayıb. Həmin videoçarxda onlar deyirlər ki, biz birinci Bakını, sonra isə Yerusəlimi azad edəcəyik. Vaxtilə də İran-İraq müharibəsində deyirdilər ki, əvvəl Kərbəlanı sonra isə Yerusəlimi azad edəcəyik. Əslində onlar bununla İran xalqının diqqətini sosial problemlərdən yayındırmaq istəyirlər. Həmçinin farsları rejim ətrafında birləşdirməyə çalışırlar ki, baxın, əgər siz öz hüquqlarınız ətrafında mübarizə aparsanız, biz sizə demokratiya versək, hüquqlar tanısaq, o zaman bunu azərbaycanlılar üçün də etməliyik. O zaman da İranın bütövlüyünə təhlükə yaradacağıq. Ona görə də, siz gərək dözəsiniz, öz hüquqlarınız ətraında müzakirə aparmayasanız.
“Ölkəmizin adı Şimali Azərbaycan olmalıdır”
Hörmətli sədr, hörmətli həmkarlar! Mən əvvəllər də bu məsələni qaldırmışam. Azərbaycanda dövlət quruculuğu istiqamətində atılan addımlar, siyasi proseslər, cəmiyyətimizin inkişafı bizim yeni konstitusiya qəbul etməyimizi zərurətə çevirir. Hesab edirəm ki, yeni konstitusiyada ilk dəyişəcəyimiz məsələ Azərbaycan dövlətinin adının dəyişdirilməsi olmalıdır. Biz, Bütöv Azərbaycanın cəmi 20 faizini təşkil edirik. Ona görə də bizim Azərbaycan adına iddia etməyə haqqımız yoxdur. Ölkəmizin adı Şimali Azərbaycan olmalıdır. Necə ki bölünmüş başqa xalqlar, məsələn Cənubi və Şimali Koreya var. Bütün dünya bilməlidir ki, Azərbaycan 200 il əvvəl iki imperiya tərəfindən ikiyə bölünüb. Yəni biz, ikiyə bölünmüş bir xalqıq. Düşünürəm ki, bu həm də cənubi azərbaycanlılar üçün bir stimul olar. Buna görə də mən bu məsələni bütün ictimaiyyətin, xalqımızın, dövlət rəsmilərinin diqqətinə çatdırmağı zəruru hesab etdim”.
Son şərhlər