Avropa Oyunlarının Bakı şəhərində keçirilməsi ilə əlaqədar olaraq Böyükşor gölü sahilində yeni tikilən Olimpiya stadionuna nəqliyyat vasitələrinin birbaşa təhlükəsiz və rahat hərəkətini təşkil etmək məqsədilə Heydər Əliyev və Ziya Bünyadov prospektlərinə paralel, 6 hərəkət zolaqlı yeni avtomobil yolunun tikintisi sürətlə davam etdirilir.
Nəqliyyat Nazirliyinin “Azəryolservis” ASC-dən “APA-Economics”ə verilən məlumata görə, layihəyə uyğun olaraq 2 tunel, 2 körpü, 1 piyada tuneli və 1 piyada körpüsünün inşası nəzərdə tutulub.
Təxminən işlərin 70%-i yerinə yetirilən uzunluğu 276 metr, qapalı hissəsi 58,5 metr olan 1-ci tunelin və uzunluğu 205 metr olan 1-ci körpünün, eləcə də uzunluğu 169 metr olan 2-ci körpünün tikintisi başa çatdırıldıqdan sonra yeni tikilən yoldan Olimpiya stadionu ərazisinə, eləcə də Hava Limanından və Olimpiya stadionu ərazisindən şəhərin mərkəzinə doğru hərəkət edən nəqliyyat vasitələrinin yeni tikilən avtomobil yoluna birbaşa çıxışı təmin olunacaq.
Tikinti işlərinin böyük hissəsinin yerinə yetirildiyi Ziya Bünyadov prospekti ilə kəsişmədə yerləşən uzunluğu 462 metr, qapalı boyu 54,3 metr olan 2-ci tunel yeni tikilən avtomobil yolundan istifadə etməklə Olimpiya stadionu ərazisinə birbaşa təhlükəsiz hərəkəti təmin edəcək və stadion ərazisində tikilən dairəvi hərəkət üçün nəzərdə tutulan avtomobil yolları ilə bağlantılar yaradacaq.
Bundan əlavə, Koroğlu metro stansiyası ərazisindən Olimpiya stadionuna piyadaların təhlükəsiz keçidini təmin etmək məqsədi ilə inşa olunan piyada körpüsündə işlərin 80%-i yerinə yetirilib, piyada tunelində isə qazma işləri başa çatdırılıb. Sözügedən layihələrin 2015-ci ilin aprel ayınadək başa çatdırılması nəzərdə tutulub.
Son şərhlər