Sirr deyil ki, Bakıda axşam saat 5-dən sonra tıxac üçün əməlli-başlı hazırlıq işləri görülür. Bəzən tıxac olmayacağını təxmin etdiyimiz ərazilərdə də polis və yaxud da yol çəkənlərin zamanlama xətaları səbəbindən tıxaclarla üzləşirik.
Amma bir çox hallarda tıxacların yaranması deyil, aradan qaldırılması çox sadə olsa da bu işə əl qoymalı olan dövlət orqanları prosesdə nədənsə müşahidəçi qismində iştirak edirlər. Elchi.az dünən Bakının ən problemli nöqtələrindən olan “20 Yanvar” dairəsi ərazisində Nəqliyyat Nazirliyinin əməkdaşlarının və yol polislərinin tıxacla necə rəvac vermələrinin şahidi olub. Təqdim edəcəyimiz foto və videolardan da göründüyü kimi, yolun dayanmaq və durmaq qadağan olunan ərazisində, kameraların müşaiyyət etdiyi yerdə qanunsuz fəaliyyət göstərən taksilər 2 cərcə olaraq düzülüb. Nəzərə alsaq ki, bu yol 3 maşın enindədir və yoldan Tibilisi prospektindən “20 Yanvar” dairəsinə axın edən maşın kütləsinin əna azı 90 faizi istifadə edir, o zaman yaranan tıxacın uzunluğunu təxmin etmək o qədər də çətin olmaz.
Təbii ki, istənilən qadağan olunan ərazidə saxlanılan maşının sürücüsünün qorxulu röyasına çevrilmiş yol polislərinin bu ərazidə gözə dəyməmsi və əməlləri ilə İŞİD yaraqlılarını kölgədə qoyan nəqliyyat müşəttişlərinin baş verənlərə tamaşaçı qismində yanaşması torbada pişiyin olmasından xəbər verən amildir. Elə bu “pişiyi” torbadan çıxarmaq üçün sürücülərdən birinə yaxınlaşdıq. Sumqayıta gedəcəyimizi bildirib 2 manata sövdələşdik və biz maşına o isə metro stansiyasının çıxışına – növbəti müştərilərini səsləməyə yollandı. Əzablı görüntülər idi – metrodan çıxan hər kəsi az qala zorla maşına basmaq üçün yarış gedir bu ərazidə. Nəhayət, bizim sürücü daha 3 müştəri taparaq geri döndü. Uzun və təhlükəli yolçuluq başladı. Yolda məramımızı anlatdıq. Səsli və görüntülü danışığa razı olmasa da, bildirdi ki, əvvəllər Bakı-Sumqayıt işləyən “Ford” markalı maşınlarda sürücülük edirdi. Sonra taksi sürücüləri rəqabət zəminində “nəqliyyata” (ifadəni olduğu kimi saxlayırıq-red.) pul verərək “Ford”ları bazardan çıxardı. Müsahibimiz bildirdi ki, o da bundan sonra özünə “Opel” alaraq fəqliyyətinə taksi kimi davam edir.
O, “20 Yanvar” haqda danışarkən bildirdi ki, həmin ərazidə dayanmaq pulludur. Həm də bu zaman harada dayanacağının da əhəmiyyəti var. Onun sözlərinə görə, körpünün altında dayanmaq üçün hər gün “Nəqliyyat Müfəttişləri”nə 5 manat, “postavoylara” 2 manat və yol polislərinə 5 manat ödəmək tələb olunur. Başqa sözlə, “20 Yanvar” dairəsində tıxac yaratmaq üçün gün ərzində ən az 12 manat pul ödəmək tələb olunur. Təbii ki, bu ödəmənin qarşılığında nə Yol polisi səlahiyyətliləri, nə Nəqliyyat Nazirliyi yaranan tıxaclara səbəbiyyət verən amilləri görmür. Daha doğrusu görmək istəmir…
Elchi.az
Son şərhlər