250 saylı uşaq bağçasında Novruz bayramı münasibətilə keçirilən şənlik uşaqlar üçün unudulmaz anlarla yadda qalıb. Tədbir zamanı bağçanın müəlliməsi Gülnarə Əhmədova “Bahar qızı” obrazında səhnəyə çıxaraq balacalara bayram ab-havası yaşadıb. Onun bu addımı uşaqlar tərəfindən böyük sevinc və coşqu ilə qarşılanıb.
Gülnarə Əhmədova saytımıza açıqlamasında bildirib ki, bu bağça onun üçün sadəcə iş yeri deyil, həm də uşaqlıq xatirələrinin başladığı məkandır:
“Demək olar ki, 1 yaşımdan bu bağçada böyümüşəm. Anam baxçada tərbiyəçi müəllimə işləyirdi, mən də onunla birlikdə gəlib-gedirdim. Həmişə deyirdim ki, gələcəkdə burada müəllimə olacağam. Öz müəllimlərimi çox sevirdim, indi isə həmin sevgini şagirdlərimdən görürəm.”
O qeyd edib ki, hələ tələbə olarkən, ikinci kursdan etibarən bağçada çalışmağa başlayıb və artıq 13 ildir bu sahədə fəaliyyət göstərir:
“Bir daha dünyaya gəlsəydim, yenə bu peşəni seçərdim. Mən uşaqlarla işləyərkən dincəlirəm. Bayramlarda və tədbirlərdə müxtəlif ideyalarla əyləncələr təşkil edirik. Bu da uşaqlara olan sevgimdən irəli gəlir.”
Novruz şənliyi ilə bağlı danışan müəllimə bildirib ki, “Bahar qızı” obrazında çıxış etmək ideyası musiqi müəlliminin təklifi olub:
“Bayram ərəfəsində musiqi müəlliməmiz mənə təklif etdi ki, uşaqlarla birlikdə rəqs edim. Mən də bunu məmnuniyyətlə qəbul etdim. Rəqs mənim hobbimdir. Uşaqlar bu çıxışı çox böyük sevgi ilə qarşıladılar.”
Gülnarə Əhmədova indiyədək 4 qrup məzun yola saldığını və illər keçsə də, keçmiş şagirdlərinin onu unutmadığını vurğulayıb:
“Məzun olan uşaqlar böyüyüb, amma yenə də məni görməyə gəlirlər. Bu, müəllim üçün ən böyük xoşbəxtlikdir. Nə xoş mənə ki, uşaqların sevgisini qazana bilmişəm.”
Sonda o əlavə edib ki, müəllim üçün ən vacib amil peşəsini sevməkdir:
“Müəllim ilk növbədə öz peşəsini sevməlidir ki, uşaqlara da sevgi və qayğı ilə yanaşa bilsin.”
