Rusiya rəhbərliyi ciddi təşviş içindədir
Rusiyanın Dağlıq Qarbağda alovlana biləcək yeni müharibəyə cəlb edilməsi ehtimalı Putin hökumətini təşvişə salıb. Məsələ burasındadır ki, Moskva ilə Yerevan arasında qüvvədə olan müqaviləyə görə Ermənistan hücuma məruz qalarsa, Rusiya onun köməyinə gəlməlidir. Bu səbəbdən Ukraynanın cənub-şərqində ilişib qalan Rusiya üçün Dağlıq Qarabağda geniş miqyaslı müharibənin başlaması vahiməli ssenari sayıla bilər. Rusiya mətbuatında belə fikir hakimdir ki, Azərbaycan-Ermənistan təmas xəttində son günlərdə gərginliyin artması kənar qüvvələrin, yəni Qərbin Rusiyanı tələyə salmağa yönələn düşünülmüş planının nəticəsidir. Bu o deməkdir ki, həmin mülahizəyə əsasən, Qərb Kremli ikinci bir ixtilafa cəlb etməklə Rusiyanı zəiflətməyə çalışır. “Moskovskiy Komsomolets” qəzeti qeyd edir ki, bir çox qərbli ekspert Qarabağ ixtilafının yenidən alovlanması barədə çoxdan xəbərdarlıq etmişlər. Bu günlərdə isə Almaniyanın Deutsche Welle radiosu bir qrup ekspertin hazırladığı sənədi yaymışdır. Sənədin müəllifləri hesab edirlər ki, yaxın aylarda Gürcüstan, Dnestryanı regionunda və Dağlıq Qarabağda silahlı ixtilafların alovlanması ehtimalı yüksəkdir. Rusiya qəzetinin fikrincə, Ukraynada ağır böhran davam etdiyi zaman Rusiyanı bütün MDB məkanında yeni ixtilaflara cəlb etmək bir sıra ölkələrə faydalı ola bilər. Qəzet hətta iddia edir ki, Ermənistan-Azərbaycan ixtilafının körüklənməsində Azərbaycanın müttəfiqi olan Türkiyə maraqlı ola bilər. Belə nəticəyə gəlmək olar ki, Ukrayna ilə yanaşı Dağlıq Qarabağ müharibəsinin başlaması Rusiyanı şətin vəziyyətə sala bilər və Kreml hər vasitə ilə bu ssenarinin qarşısını almağa çalışır. Vladimir Putinin Azərbaycan və Ermənistan prezidentləri ilə görüşüb, təmas xəttində gərginliyi azaltmaq təşəbbüsünə baş vurması Kremlin ciddi təşvişindən irəli gəlir.
Mirzə Xəzər