Venesuela prezidenti Nikolas Maduro ABŞ-ın Karib hövzəsindəki hərbi fəaliyyətinə sərt reaksiya verib, Vaşinqtonu ölkəsində “kukla hökumət” qurmaq planında ittiham edib.
Elchi.az xəbər verir ki, Dövlət televiziyası VTV-nin məlumatına görə, paytaxt Karakasda keçirilən konfransda çıxış edən Maduro ABŞ-ın müdafiə naziri Pit Heqsetin beynəlxalq sularda narkotik daşıyan gəmini vurduqlarına dair açıqlamasına toxunub.
“Amerika xalqı çox yaxşı bilir ki, Venesuelaya qarşı planlaşdırılanlar rejim dəyişikliyi, oyuncaq hökumətlər qurmaq və ölkənin neft, qaz, qızıl və bütün təbii ehtiyatlarını oğurlamaq məqsədi daşıyan silahlı hücumdur”, – Maduro bildirib.
ABŞ-ın ölkəsinə qarşı mümkün hücumuna boyun əyməyəcəklərini vurğulayan Maduro, “Venesuela gücündən və adından asılı olmayaraq heç bir imperiyanın qarşısında boyun əyməyəcək. Önümüzdəki illərdə o imperiyaya layiq olduğu mənəvi, əxlaqi və siyasi dərsi verəcəyik” – deyib.
Maduro ölkəsinin sülh, suverenlik və varlıq haqqına sahib olduğunu bildirərək, “Lazım gələrsə, silahsız mübarizə formalarından silahlı mübarizə formalarına keçəcəyik. Bu insanlar bunu sülh üçün edəcək” – deyib.
Digər tərəfdən, Venesuela Birləşmiş Millətlər Təşkilatının (BMT) Təhlükəsizlik Şurasına müraciət edərək, ABŞ döyüş təyyarələrinin ölkə sahilinin təxminən 75 kilometrliyində “hava məkanını qeyri-qanuni pozduğunu” əsas gətirərək şikayət edib.
ABŞ Müdafiə Naziri Heqseth beynəlxalq sularda narkotik daşıdığını söylədiyi qayığa “ölümcül, kinetik hücum” əmri verdiyini və qayıqda olan 4 nəfərin həlak olduğunu açıqlayıb.
ABŞ prezidenti Donald Tramp daha əvvəl Latın Amerikası narkotik kartelləri ilə mübarizə üçün bir sərəncamla ordudan istifadənin artırılması və daha səmərəli istifadə edilməsi barədə göstəriş vermişdi.
ABŞ-ın Venesuela sahillərində bəzi qayıqları “narkotik qaçaqmalçılığı” səbəbi ilə hədəfə alması həm Venesuela hökuməti, həm də beynəlxalq ictimaiyyət tərəfindən tənqidlərə səbəb olub, bəziləri hücumların “beynəlxalq hüquqa zidd” olduğunu iddia edib.
Nuranə Məmmədova
