Kuba hökuməti Müqəddəs Həftə şənlikləri çərçivəsində 2010 məhbusun əfvini təsdiqlədiyini açıqladı.
Elchi.az xəbər verir ki, Kuba mətbuatındakı xəbərlərə görə, hökumət qərarın Müqəddəs Həftə şənlikləri ilə əlaqədar verildiyini bildirib.
Bəyanatda deyilir: “Bu qərar həbsxanadakı məhbusların yaxşı davranışı və sağlamlığı nəzərə alınmaqla verilib. Əfv olunan 2010 məhbus arasında gənclər, qadınlar, 60 yaşdan yuxarı yetkinlər, azadlığa çıxma tarixi yaxınlaşanlar, xaricdə yaşayan əcnəbilər və Kuba vətəndaşları var.”
Bəyanatda vurğulanır ki, əfv olunan şəxslərin siyahısına cinsi təcavüz, zorakı cinayətlər, qətl, narkotik cinayətləri, oğurluq, heyvan qırğını, uşaq istismarı və hakimiyyət əleyhinə cinayətlərdə məhkum edilmiş şəxslər daxil deyil. Həmçinin xatırladılır ki, Kuba hökuməti 2011-ci ildən bəri 11.000-dən çox insana əfv verib.
Müqəddəs Həftə və ya Əzab Həftəsi İsa Məsihin bəşəriyyət üçün əziyyət çəkdiyinə inanılan həftə hesab olunur.
Şayəstə
