Kobanidəki İŞİD komandiri öldü

Suriyada daha bir qruplaşma İŞİD-ə qoşulduğunu bəyan etdi, terror təşkilatı mövqelərini itirir

Kobani uğurunda İŞİD və kürd yaraqlıları arasında döyüşlər 34 gündür davam edir. Bu müddətdə İŞİD qüvvələri bir neçədə dəfə Kobanini almağa yaxın olsalar da, koalisiya aviasiyasının şiddətli bombardmanları və YPG silahlılarının güclü müqaviməti nəticəsində geri çəkilməyə məcbur olublar.

Kobanidə hücumlarda nəticə əldə edə bilməyən İŞİD qüvvələri kürdlərin dünya ilə yeganə əlaqəsinin təmin edildiyi Suriya-Türkiyə sərhədindəki Mürşidpınar sərhəd məntəqəsini minaatan atəşinə tutub. Artıq Türkiyə silahlı qüvvələri sərhəddə atəşə qarşı hazırlıq vəziyyətinə gətirilib. Hətta minaatanlar sərhəddə olan iki ambulansa da atəş açıb. Ambulansların tamamilə yararsız hala düşməsindən sonra yerli əhali mülki avtomobillərlə yaralıları Türkiyə sərhədinə daşıyıblar. Yeri gəlmişkən, son məlumatlara görə, 34 gün davam edən savaş nəticəsində 802 yaralı sərhəddən keçirilərək Türkiyəyə aparılıb və sərhəddəki Suruç qəsəbəsinin xəstəxanasına, daha ağır durumda Diyarbəkir, Şanlıurfa və Qaziantepdəki xəstəxanalara aparılıb.

Suriya İnsan Haqları Müşahidə Mərkəzinin məlumatına görə, koalisiya qüvvələrinin bombardmanları zamanı İŞİD-in Kobaniyə hücum qüvvələrinin komandiri Məhəmməd Casim öldürülüb. Təşkilat həmçinin YPG qüvvələrinin Kobanidəki radio mərkəzi adlandırılan bölgəni ələ keçirdiyini bəyan edib.

Bu arada Suriyanın İdlib şəhəri və ətrafında fəaliyyət göstərən Şam təşkilatı adlandırılan silahlı qrup İŞİD-ə qoşulduğunu, əl-Bağdadiyə beyət etdiklərini bəyan edib. O da bildirilir ki, bu bəyanatdan sonra qruplaşma ona məxsus maşınlarda bütün silahlarını və tərəfdarlarını da yığaraq İŞİD-in Suriyadakı mərkəzi olan Rəkkaya gəlib.

İraqda da İŞİD-ə qarşı əməliyyatlar davam edir. Hökumət ordusu və könüllü briqadaların, o cümlədən yerli tayfa birliklərinin apardığı hücum əməliyyatları nəticəsində Diyalə və Səlahəddin əyalətləri arasında yerləşən strateji Karagöl məntəqəsi İŞİD-dən təmizlənib. İki vilayəti bir-birinə bağlayan Karagöl məntəqəsi hökumət üçün mühüm əhəmiyyət daşıdığı bildirilir.