2002-ci ildə ABŞ-da Rusiyanın xeyrinə casusluq ittihamı ilə ömürlük həbs cəzasına məhkum edilmiş 79 yaşlı keçmiş FTB agenti Robert Hanssen öz kamerasında ölü tapılıb.
Elchi.az İHA-ya istinadən xəbər verir ki, 2002-ci ildə ABŞ məhkəməsi tərəfindən Sovet İttifaqına, daha sonra isə Rusiyaya 20 ildən çox casusluq etməkdə təqsirli bilinən və ömürlük həbs cəzasına məhkum edilən 79 yaşlı keçmiş FTB agenti Robert Hanssen Koloradodakı yüksək təhlükəsizlik həbsxanasındakı kamerasında ölü tapılıb.
Federal Həbsxanalar Bürosu verdiyi açıqlamada, Hanssenin həmin səhər kamerasında huşsuz vəziyyətdə tapılmasından sonra ilk yardımın həbsxana rəsmiləri tərəfindən edildiyini və bütün müdaxilələrə baxmayaraq Hansseni xilas etmək mümkün olmadığını bildirib. Bəyanatda Hanssenin ölümünün səbəbi açıqlanmayıb.
FTB-nin məlumatına görə, 1976-cı ildə FTB-yə qoşulan Hanssen 1985-ci ildə Sovet İttifaqına məxfi məlumatları satmağa başlayıb. Hanssen 2001-ci ildə həbs olunanda onun çoxsaylı insan resurslarını, kəşfiyyat texnikalarını və ABŞ-ın məxfi sənədlərini ələ keçirmək müqabilində 1,4 milyon dollardan çox rüşvət aldığı üzə çıxıb. FTB müstəntiqləri agentlik daxilində casusun kimliyini müəyyən etmək üçün illər boyu çalışıblar. FTB-nin məlumatına görə, 2001-ci ilin fevralında həbsindən bir neçə həftə əvvəl 300-ə yaxın əməkdaş Hanssenin istintaqı və monitorinqi üzərində işləyirdi.
Hanssen, FTB tərəfindən Virciniya parkında gizli bir yerdən istifadə edərək iki şəxs arasında məxfi materialların və ya məlumatların ötürülməsi üçün istifadə edilən casusluq ticarəti üsulu olan “ölü məktub qutusu” hazırlayaraq tutulmuşdu.
Nuranə Məmmədova
Son şərhlər