İsraildən Qəzza qərarı! Bölmə rəsmi olaraq geri çəkilir

Qəzzada dinc əhaliyə qarşı yüz gündən çox davam edən qırğınlardan sonra İsrail Ordusu geri çəkilmək qərarına gəlib.
Elchi.az xəbər verir ki, İsrail ordusu radiosundan verilən açıqlamada Qəzza zolağında 3 diviziyanın “müharibəni” davam etdirəcəyi, 36-cı diviziyanın da geri çəkiləcəyi bildirilib.
İsrail ordusu dekabrın 31-də verdiyi bəyanatda 551-ci ehtiyat briqadası, 14-cü briqada və üç təlim briqadasını Qəzza zolağından çıxaracağını açıqlayıb.
İsraildə yerləşən “Walla” xəbər saytı və Kanal 12 televiziyası dekabrın 21-də Colani Briqadasının qoşunlarının ağır itki verdikdən sonra istirahət etmək üçün Qəzza zolağından geri çəkildiyini açıqlayıb.
Bundan əlavə, İsrailin rəsmi televiziyası KAN-ın yanvarın 4-də yaydığı xəbərdə ordunun Qəzza zolağının bəzi bölgələrində daha kiçik hərbi qüvvələrlə müharibənin üçüncü mərhələsinə daxil olduğu bildirilib.
Lakin İsrail ordusu üçüncü mərhələyə keçidlə bağlı rəsmi açıqlama verməyib.

Nuranə Məmmədova