Siyasi sığınacaq istədi, 6 il iş aldı 
“The Associated Press”in xəbərində deyilir ki, Şimali Koreyanın paytaxtı Pxenyanda ABŞ vətəndaşı Metyu Müllerlə bağlı məhkəmə prosesi keçirilib. 24 yaşlı amerikalı paytaxt hava limanında saxlanılmışdı. 2014-cü ilin aprel ayında Şimali Koreyaya daxil olan amerikalı bu ölkəyə məxsus vizanı cırmış və bu ölkədən siyasi sığınacaq istəmişdi. Ancaq onun hərəkətləri yerli rəhbərliyə o qədər də xoş gəlməmişdi.
Məhkəmənin amerikalıya hansı hökm çıxarması barədə hələ ki, bir məlumat verilmir. Ancaq əvvəl daxil olmuş xəbərlərdə bildirilirdi ki, ABŞ üç vətəndaşının azad olunması üçün rəsmən Şimali Koreyaya müraciət edib. Müraciətdə deyilir: “Humanizmi rəhbər tutaraq sizlərə müraciət edirik. Ceffri Foyla, Metyu Müller və Keneta Beyin azad olmasını xahiş edirik.
Onların evə dönməsini təmin edin”, ABŞ Dövlət Departamentindən Cennefer Psak bəyan etmişdi. Müraciətdə deyilirdi ki, Keneta Beyi isə dərhal buraxmaq lazımdır ki, o, öz ailəsinə qovuşsun və gərəkən tibbi müalicəyə cəlb olunsun. Keneta Bey Koreya əsilli amerikalıdır. O, 2012-ci ildə həbs olunub və ona 15 il iş veriblər. Hazırda o, həbsxananın nəzdində olan əmək müəssəsində çalışır. Cənab Bey Şimalı Koreyada mövcud olan iqtidarı devirmək üçün ölkəyə yasaq olunmuş ədəbiyyat gətirməkdə suçlu bilinib. Qərb mediası vurğulayır ki, onun səhhətində ciddi problemlər var.
Ceffri Foyla da Metyu Müller kimi Şimali Koreyaya 2014-cü ilin aprelində gəlib. Onun suçu odur ki, o, qaldığı hoteli tərk edərkən İncil kitabını orada unudub. Elə bu səbəbdən də onu həbs ediblər. Son anda aldığımız məlumata görə bu gün Şimali Koreya məhkəməsi Metyu Müllerə 6 il iş verib. O, qanuna əsasən islah-əmək düşərgəsində çalışmalı olacaq.
Elbəyi Həsənli, Sürix
Son şərhlər