Texnologiya dünyasının iki nəhəngi Elon Musk və Sem Altman arasındakı hüquqi mübarizə yeni bir ölçü götürüb. Kaliforniyadakı federal məhkəmədə başlayan mülki məhkəmə prosesində münsiflər heyətinin seçimi davam edərkən, bu işin yalnız şəxsi qisas deyil, həm də süni intellekt sektorunun və OpenAI-nin gələcəyini müəyyən edəcək bir dönüş nöqtəsi olacağı gözlənilir.
Elchi.az xəbər verir ki, dörd həftə davam etməsi planlaşdırılan məhkəmə prosesində Tesla şirkətinin baş direktoru Musk və OpenAI şirkətinin baş direktoru Altmanın, eləcə də Microsoft şirkətinin baş direktoru Satya Nadella kimi sektorun ən nüfuzlu şəxslərinin şahid qismində çıxış edəcəyi gözlənilir.
Mübahisənin mərkəzində 2015-ci ildə qeyri-kommersiya tədqiqat mərkəzi kimi qurulan OpenAI-nin milyardlarla dollarlıq investisiyası olan kommersiya nəhənginə çevrilməsi dayanır.
Musk iddia edir ki, Altman və digər təsisçilər ona pul, məsləhət və vaxt alarkən “ictimai rifah üçün işləyən bir struktur” vəd ediblər, lakin sonradan bu vədi pozub şirkəti şəxsi qazanc mənbəyinə çeviriblər.
İşin əsas məsələləri nələrdir?
Mask OpenAI və Microsoft tərəfindən əldə edilən gəlirin fonda köçürülməsini və Sem Altman və Qreq Brokmanın vəzifələrindən uzaqlaşdırılmasını tələb edir.
Altmanın tərəfi isə Maskın tarixi yenidən yazmağa çalışdığını iddia edir. Onlar Maskın 2018-ci ildə şirkətdən ayrıldığını, vəd etdiyi 1 milyard dollarlıq maliyyələşdirməni heç vaxt tam yerinə yetirmədiyini və əslində OpenAI-ni öz şirkəti Tesla-ya daxil etmək istədiyini iddia edirlər.
İddia ərizəsində həm oxşar, həm də diametral olaraq əks olan iki şəxs arasında xarakter mübarizəsi də vurğulanır.
645 milyard dollar sərvəti olan dünyanın ən varlı adamı Mask Texasda yaşayır və siyasi cəhətdən Respublikaçılar tərəfi ilə müttəfiqdir.
41 yaşlı Altman San-Fransiskoda qalır və şirkətin oradakı ofislərini genişləndirməyə davam edir.
Şayəstə
