Azərbaycanda Putinin dostu kimi tanınan iş adamı İlham Rəhimov Quba rayonunda bir sıra torpaqları zəbt edib.
Bu barədə modern.az reportaj dərc edib. Yazıda bildirilir ki, iş adamı zorla, adamlara hədə-qorxu gələrək torpaqları zəbt edib, insanların şəxsi mülkiyyətinə sahib olmaq istəyir. Qubalılar deyir ki, İlham Rəhimov Rusiyada öyrəndiyi “bespredel” davranışlarını Azərbaycanda da işə salır. Sayt aldığı şikayət üzərinə Qubada araşdırma aparıb.
Sayt yazır: “İlham Rəhimovun zorbalıq prinsipinin mahiyyəti məhz bundan ibarətdir. Villasının yaxınlığındakı, başqalarının, üstündə tikili olmayan və qeyrilərinin halal torpağına, yaşıllaşdırılan bir sahəyə göz qoyub. Özü də təsadüfə baxın ki, özünə məxsus kənd təsərrüfatı təyinatlı torpağı hansı yollasa təyinatını dəyişərək, ağacları qıraraq tikililərlə doldurduğu ərazidən fərqli olaraq, bağ ərazisi kimi saxlanılan qonşunun torpağına gözü düşüb. Araşdırma zamanı öyrəndik ki, oliqarxın qonşusunun sahəsi heç bir meşə və yaxud başqa kateqoriya torpağına aid deyil, 1 santimetr və 1 ağac belə dövlət mülkiyyət sənədindən kənara çıxmır və elə İ.Rəhimovun ərazisinə aid nə sənədi varsa, bu torpağın da var.
Bu sahə qanuni icarə əsasında Azərbaycan Qərb Universitetinə məxsusdur. Baxmayaraq ki, bəzi KİV-lər əsassız yerə bu yerin meşə fonduna aid olduğunu və zəbt edildiyini qeyd edib. Amma sənədlərdən öyrəndik ki, icarə əsasında Universitetin İnsan İnkişafı İnstitutu (təhsil naziri işləmiş mərhum Lidiya Rəsulova da istefasından sonra bu institutun direktoru olub) bu sahədə eksperimental bağçılıq sahəsi yaradıb, meşə zolağını da elə bu insanlar öz özəl ərazilərində yolun səsini, qonşuları eşitməmək, görməmək üçün son 15-16 ildə minlərlə ağac əkərək salıblar. Birisi öz ərazisində qonşuları eşitməmək, görməmək üçün yaşıl zolaq yaradır, digəri də deyir ki, mən səni, sənin yaşıl zolağını da görmək istəmirəm. Burada müxtəlif növ ağac və bitki növlərinin şəraitə davamlılıq məziyyətləri öyrənilir, müxtəlif təsərrüfat fəaliyyətlərinin effektivlik dərəcəsi müəyyən edilir, yerli şəraitlə uyğunlaşdırılmış növlər yetişdirilir. (Bizə göstərilən sənədlərdən görünür ki, bu ərazi əvvəllər sovxoz mülkiyyətində olub və kənd təsərrüfatı təyinatlıdır, sonralar pay torpaqları kimi əhaliyə paylanıb və ərazi halallıq prinsipləri qorunaraq (yerli əhali də bunu təsdiq edir) qanuni qaydada payçılardan satın alınıb).
Onu da deyək ki, hazırda həmin ətrafda yalnız bu sahənin kənd təsərrüfatı təyinatı qorunub saxlanılır. Hədsiz sayda ağac əkilib, çay kənarında (çayın sahili yumasının qarşısını almaq üçün) və digər özəl sahələrdə zəhmət bahasına son 18 ildə meşə zolağı yaradılıb”.
Reportajda həmçinin Rəhimovun başqasının mülkiyyətini zəbt etdiyi də bildirilir: “O əvvəlcə adamları hasara alınmış özəl mülkiyyətin hasarlarını söküb, sonra qəsdən villasının çirkab sularını bu sahəyə yönəldib, dayanmayıb, üstəlik özgəsinin yerinə balkon da çıxarıb. Qeyd edək ki, gördüyümüz sənədlərdə Azərbaycanda bu insanın qanunsuz əməllərinin qanuni yolla qarşısının alınmasına çalışılıb. Yerli polis hasar sökənləri yaxalayıb, özgə mülkiyyətinə zərər vurduqlarına görə cinayət işi qaldırılıb, cərimə edilib. Sonradan isə Universitet humanistlik göstərərək, hasar sökən şəxsləri, öz təqsirlərini etiraf etdiklərinə görə bağışlayıb.
Yerli sakinlər deyir ki, 1996-cı illərin əvvəllinədək bağ yerləri olmuş, indi dəbdəbəli villaların göbələk kimi çoxalmağa başladığı Qəçrəş kəndinə doğru yolun sağında və solundakı ərazilərdə bir dənə də ağac qalmamışdı. Ən bahalı və necə deyərlər “prestijli” də elə bu yerlər idi. Qudyalçayına daha yaxın, dərənin altında daha rütubətli ərazilər o qədər də maraqlı görünmədi villa tikənlərə. Qərb Universitetinin tapşırığı ilə elə həmin illərdə burada bir neçə pay torpağı sahiblərindən halallıqla satın alınıb. İlham Rəhimovlardan fərqli Universitet torpağın təyinatını min bir fırıldaqla dəyişməyib, elə kənd təsərrüfatı üçün istifadə etmək qərarına gəlib, gözəl eksperimental bağlar salıb ki, 10 ildən sonra məhsul verməyə başlayacaq. Univerisitet buradan gəlir götürmür, olan meyvəni də nəzdindəki məktəbə, uşaqlar üçün təhvil verir. Sıx, yaşıl meşə zolaqları salınıb ərazidə, daha nəhəng villalar tikılməyib. Mövcud, çiy kərpicdən olan bir mərtəbəli binanı təmir edib istifadə edir. At tövləsini təmir edib istifadə edir. Rütubətli olması insanlara xeyrli olmasa da, ağaclara düşərli olub bu yerin şəraiti. İndi İlham Rəhimov qonşuluğa gəlib bu yerin kimin qoruyub saxladığına gözü düşüb?
Öyrəndik ki, Rəhimovun villasının ətrafı elə digər villalarla əhatələnib. Yəni onun genişlənməyə başqa istiqaməti olmadığından üzünü camaatın (Universitetin) min bir əziyyətlə yetişdirib saxladığı bağ-baxçaya yönəldib. Rəhimovun adamları qonşuluqdakı Qərb Universitetinin istifadəsində olan ərazinin hasarını sökərkən içəridəki ağacların qolunu, gövdəsini, budağını ciddi zədələdikləri üçün Universitet məcbur olub həmin ağacların yerinə yeni ağaclar əkib.
Yaxınlıqdakı kəndlərin sakinlərindən biri olan Məhəmməd Əlməmmədov deyir ki, bu ərazi hasara alınsa da, burada əksəriyyəti meyvə ağacı olmaqla xeyli sayda ağac əkilib, yaşıllıq salınır. Təbiətə heç bir ziyan dəymir. Elmar Cəfərov isə bildirir ki, bu ərazidə bir neçə yerdən adamların, mal-qaranın çaya çıxması üçün keçidlər qoyulub. Bir də öyrəndik ki, hasarların çəkilməsində də məqsəd meyvə ağaclarını mal-qaradan qorumaqdır. Digər bir məqam isə ondan ibarətdir ki, bu yol qırağı sahə quldurların iddia etdiyi kimi nəinki 5 kilometr, heç də kilometrlərlə uzanmır, ümumi sahə cəmi 9-10 hektardır ki, bu da yerli camaatın əksəriyyətinin mülkiyyətində olan torpaq sahəsi ilə eynidir. Hətta 5 kilometr olsa belə, əgər pulunu verib torpağı satan vətəndaşdan alınıbsa, bunun kimə nə dəxli var? Azərbaycanda indi nəinki 10-20, hətta 1000 hektar torpağı olan fermer var. Sənədlər isə göstəriri ki, bu ərazi hələ 1998-ci ildən sahibindən qanuni yolla alınıb”.
Məlumat üçün bildirək ki, bu qalmaqala görə, Universitet məcbur olub yenidən hüquq-mühafizə orqanlarına öz hüquqlarının qorunması üçün müraciət edib.
Son şərhlər