Millət vəkili Hadi Rəcəblinin möhtəşəm yeniliklərilə gündəmi silkələməsi, bildiyimizə görə, ilk hadisə deyil. Müəllimlərin məvacibilə bağlı verdiyi dahiyanə açıqlamalar ölkənin hər yerində qədirbilən ziyalılarımız tərəfindən dərin minnətdarlıq hissilə çox ciddi müzakirə edilir.
Doğurdan da, bu maraqlı təklifin indiyədək heç kimin ağlına gəlməməsi bizim nə qədər dar düşüncəli olmağımızdan, gerizəkalılığımızdan xəbər verir. Bu qədər bisavad, bacarıqsız insanlarla, görəsən, hara gedirik!..
Ağsaqqal millət vəkilinin verdiyi şok təklifi bəyənməyənlər bu millətin gələcəyini istəməyənlərdir. Buna qətiyyən şübhəniz olmasın. Ona da şübhəniz olmasın ki, təklif edilən fikirlər vəziyyətdən yeganə çıxış yoludur, yəni başqa yol yoxdur!..
Əgər müəllim yaxşı yaşamaq, ağ gün görmək istəyirsə, mütləq və mütləq Lənkəran rayonunun Veravul kəndinə getsin, bənnalıq, xarratlıq, bir sözlə, fəhləliklə gün keçirən və bununla da, çox ciddi kəşfə imza atan Balabəy müəllimin zəngin və təkrarolunmaz təcübəsindən bəhrələnsin. Onun yanında şagirdliyə yazılsın. Sənət öyrənsin…
İndiki dövrdə yalnız müəllim olmaq azdı, çox az. Axı biz inkişaf etmiş, sivil bir dünyada yaşayırıq. Elə bir dünyada ki, hətta millət vəkilləri müəllimə fəhləlik etməyi, daş daşımağı, bir sözlə, hamballığı təklif etməkdən çəkinmirlər. Fikrimcə, bu, tərəqqinin ən pik nöqtəsi, zirvədir və bu zirvəni fəth etmək yaxşı yaşamaq istəyən hər bir müəllimin ən ümdə vəzifəsi, müqəddəs borcudur. Naşükür olmaq lazım deyil!
Bir müəllim tanıyırdım. Kasıbçılıqdan varlıların evində fəhləlik edirdi. Bir gün o varlı adamlardan biri evə gələndə müəllimin oturduğunu görür və niyə bekar dayandığını soruşur. Müəllim iş olmadığı üçün dincəldiyini deyir. Bundan bərk qəzəblənən varlı onun üstünə çəmkirir: İş yoxdu, götür süpürgəni, həyəti süpür!!!
Bə nə deməlidi!!! Deməlidi ki, əcəb eləyirsən, düz eləyirsən, otur, dincəl, axı sən müəllimsən, sabah tezdən məktəbə gedəcəksən, balalarımıza dərs keçəcəksən və s. və i.
Adamın Allahı olar! İnsaf da dinin yarısıdır. Əlinizin ürəyinizin üstünə qoyub cavab verin: Bundan gözəl təklif ola bilərmi!!?
Hə, guya o müəllim nə elədi ki! Nə elədisə, özünə elədi! İndi acından ayaq üstə dura bilmir. Adam kəmhövsələlik etməz! Nə olsun ki, o varlı adam öz oğlunun, dərs dediyin şagirdin gözü qarşısında səni həyət süpürməyə vadar elədi! Həyəti havayı ki süpürmürsən! Bəlkə əvəzində aldığın konfet kağızıdı! Yox, aşna, konfet kağızı deyil! Puldu! Pul!!!
Bir də dilənmirsən ki! Halal zəhmətinlə pul qazanırsan da…
Axırı nə oldu! İndi qəpiyə güllə atır. O vaxtdan dərs deməyə də nə həvəsi qalıb, nə də halı! Bütün günü dominoxanalarda havalı-havalı veyillənir.
Ona görə də üzümü, xüsusilə, mənə dərs deyənlərə tuturam və onları Hadi müəllimin təklifinin çox ciddi müzakirəsini davam etdirməyə çağırıram. Amanın günüdür, özünüzdən muğayat olun. Gedin daş daşıyın, divar hörün, fəhləlik edin ki, ölməyəsiz! Balabəy müəllim kimi…
İbrahim RÜSTƏMOV
Son şərhlər