Cənubi Amerika ölkəsi Ekvadorda həbsxanada olan narkobaron Xose Adolfo Macias Villamar yoxa çıxıb.
Elchi.az İHA-ya istinadən xəbər verir ki, Ekvadordakı Los Çoneros dəstəsinin lideri, “Fito” ləqəbli Xose Adolfo Macias Villamar saxlandığı Quayaquil həbsxanasından yoxa çıxıb.
Təhlükəsizlik qüvvələri qaçdığı güman edilən Villamarın tapılması üçün həbsxana və ətrafında genişmiqyaslı əməliyyat keçirib.
Prezidentin sözçüsü Roberto İzurieta açıqlamasında əməliyyatda 3 mindən çox adamın iştirak etdiyini bildirib və “Hüquq-mühafizə qüvvələrinin cəsarəti və qətiyyətinə görə minnətdarıq”-deyib.
Xose Adolfo Macias Villamar 2011-ci ildə narkotik ticarəti, mütəşəkkil cinayətkarlıq və qətl kimi müxtəlif cinayətlərə görə 34 il həbs cəzasına məhkum edilib.
Prezidentliyə namizəd Fernando Villavicencio-nun qətlində şübhəli bilinən Fito avqust ayında keçirilən böyük əməliyyatla yüksək təhlükəsizliklə qorunan La Roka həbsxanasına köçürülüb.
Təşkilatın lideri sentyabrda məhkəmənin qərarı ilə Quayaquil bölgəsindəki həbsxanaya geri göndərilib.
Villamarın rəhbərlik etdiyi Los Choneros dəstəsi narkotik vasitələrin qanunsuz dövriyyəsi və ölkədəki əsas həbsxanalara nəzarət etməklə tanınır.
İyul ayında Quayaquil şəhərində ölkənin ən böyük həbsxanası olan Litoralda məhbuslar arasında davadan sonra baş verən iğtişaşda 31 nəfər həyatını itirmişdi.
2021-ci ildən bəri Ekvadorda izdihamlı həbsxanalarda rəqib cinayətkar təşkilatlar arasında baş verən toqquşmalarda 400-dən çox məhbus ölüb.
Nuranə Məmmədova
Son şərhlər