Erməni silahlı bölmələrinin atəşkəs rejimini pozması nəticəsində Tərtərin Qarağacı kəndində bir nəfər ölüb digəri isə ağır yaralanıb.

Bu barədə AzVision.az-a açıqlamasında kəndin bələdiyyə sədri Əzizov Rizvan Musa oğlu məlumat verib. Onun sözlərinə görə, kənddə yerləşən bələdiyyə binasında məskunlaşmış məcburi köçkün Cəlal Rəhimovun idarə etdiyi avtomobil artilieriya atəşinə məruz qalıb:

“Ermənilərin ötən gecə ağır artilleriyadan açdığı atəş nəticəsində Cəlal Rəhimovun “Vaz 2107” markalı avtomobilinin yanına mərmi düşüb. Avtomobilin içərisində olan Cəlal Rəhimov hadisə yerində dünyasını dəyişib.

Onun oğlu Orxan Rəhimov isə ağır bədən xəsarəti alıb. O, hər iki ayağını itirib. Hazırda həkimlər onu müalicə edir. Ordumuz hər şeyə nəzarət edir. Biz Azərbaycan ordusunun gücünə inanırıq. Onlar ermənilərin layiqli cavabını verirlər”.