Ermənistana keçmək istəyən Qəbələ sakinlərini nə gözləyir?

Hadisə iştirakçısı Ramin İsmayılov mətbuata açıqlamasında bunları deyib: “Nəbiyevlər uşaqlarımızı şərləyib tuturlar. ”Azərişıq”ın Bakı üzrə nümayəndəsi Qara Nəbiyev, vergilər nazirinin müşaviri Müsavər Nəbiyev, kəndin icra nümayəndəsi İkram Nəbiyev Qəbələ rayonunu ələ alıblar. Onlar bizi yaşamağa qoymurlar. Kiminsə evinə, maşınına narkotik atıb tutdururlar. Bundan bezib Ermənistan tərəfə keçmək istədik. Özümüzü erməni gülləsinin qarşısına verib canımızı Nəbiyevlərin zülmündən xilas etmək istəyirdik”.

Qeyd edək ki, Qəbələ sakinlərinin düşmən ölkəyə keçmək cəhdləri heç də ictimaiyyətdə birmənalı qarşılanmayıb. Onların ünvanına sərt tənqidlər var. Bunun fonunda Nəbiyevlər ailəsinin etdiyi haqsızlıqlara görə sakinlərə haqq qazandıranlar, eyni zamanda hadisədə təxribat izi axtaranlar da yox deyil. Hazırda sakinlərin taleyinin necə olacağı sual doğuran məsələlərdəndir.

Hüquq müdafiəçisi Mirvari Qəhrəmanlı bildirdi ki, Qəbələ sakinlərinin etdikləri dövlətimizin dünyada imicinə təhqirdir: “Vətəndaşlar düşünüblər ki, onlara qarşı ədalətsizlik olub. Araşdırmadan bu məsələlərə qiymət vermək bir qədər çətindir. Burada ətrafın diqqətini cəlbetmə cəhdləri də var. Amma istənilən halda ədalətsizliyə qarşı müxtəlif etiraz formaları var. Qəbələ sakinlərinin sərhədi keçmək istəklərinin olub-olmaması onların ifadələrindən məlum olacaq. Atılan addım düşünülmüş şəkildə olmayıb. Erməni düşmənimizdir. Sakinlər Gürcüstan, İran tərəfə keçə bilərdilər. Bu daha asan idi. Bununla da diqqət çəkmək olardı”.

Hüquq müdafiəçisi Qəbələliləri gözləyən cəzalardan da söz açdı: “Təbii ki, onlara müxtəlif cəza növləri tətbiq oluna bilər. Amma hər şeydən öncə bu araşdırılmalıdır. Onların müdafiə olunmaq hüquqları var. Hüquq müdafiəçisi kimi yox, Azərbaycan vətəndaşı kimi hesab edirəm ki, onlara cəza növləri tətbiq olunmalıdır. Buna görə məni ittiham edəcəklər. Amma torpağımı zəbt edən, minlərlə şəhid verməyimizə səbəb olan düşmənin qapısına getmək bağışlanılmazdır. Yəqin ki, onlar cəzalandırılacaqlar. Bəlkə də elə motiv tapılacaq ki, onlar bağışlanacaqlar. Burada təxribat da ola bilər. Təşkilatçını üzə çıxarmaq lazımdır. Orada kimsə günahkar ola bilər”.

M.Qəhrəmanlı Nəbiyevlər ailəsinə də toxundu: “Bu hissə daha ciddi araşdırılmalıdır. Regionlarda ”kiçik padşahlar” mövcuddur. Nəbiyevlər ailəsi insanları buna məcbur edən tərəf kimi məsuliyyətə cəlb olunmalıdır. Niyə onlar rayonda hegemonluq edirlər? Hansı cəhətlərinə görə ağalıq etməlidirlər? Bütün rayonlarda tayfalar var ki, sakinləri belə yollara təhrik edirlər. Nəbiyevlər ailəsi barəsində cinayət işi başlanmalıdır. Onlar milləti alçaltmaq dərəcəsinə çatdırıblar. İttihamları ağır olmalıdır. Ölüm həddinə çatdırmaqla, düşmən qapısına göndərmək arasında heç bir fərq yoxdur”.

Qarabağ Azadlıq Təşkilatının sədri Akif Nağı bu hadisənin cəmiyyət və dövlət üçün ciddi siqnal olduğunu söylədi: “Hadisə iki istiqamətdə araşdırılmalıdır: burada obyektiv səbəb var, yoxsa təxribat izi? Rusiya və Ermənistanın da əli ola bilər. İstənilən halda prosesdə iştirak edənlər dövlətçilik, ictimaiyyət qarşısında məsuliyyətlərini dərk etməlidirlər. Maraqlarımıza uyğun gəlməyən hadisədir. Haqsızlıq ola bilər. Əgər ölkəni tərk edirsinizsə, niyə məhz Ermənistana? Deməli burada siyasi motivlər var. Vətəndaşların diqqəti cəlb edib, problemlərini bu yolla həll etmək cəhdləri də ola bilər. Amma istənilən halda səhv addımdır. Düşmən düşməndir. Ermənistanda vəziyyət guya yaxşıdır? Oradan da Azərbaycana qaçanlar var. Aylar öncə hətta partiya rəhbəri ölkəmizə pənah gətirdi. Hansısa məmurun cəzasını dövlətçilikdən çıxmaq yolverilməzdir. Vətəndaşlar bunu düşünməlidirlər. Məmur haqsızlığı çoxdur. Nazirlər bölgələrə görüşlərə gedirlər, amma problemləri olanları yox, öyrədilmiş rayon sakinlərini qəbul edirlər. Mənə dəfələrlə bu barədə müraciətlər olub. Sadəcə, görüntü xarakteri daşıyır. Yerlərdəki məmurlar özlərini ədəbsiz aparır, insanlara zülm edirlər. Dövlət səviyyəsində bu məsələyə diqqət ayrılmalıdır. Məmurların al-ayaqları yığışdırılmalıdır. Qəbələ sakinlərinin addımları dövlətçilik məsələsidir. Bu insanlar hansısa formada düşmən ölkəyə keçməyə cəhd edirlərsə, demək, Ermənistanın siyasətinə xidmət edirlər. Onların hərəkətlərinə haqq qazandırırlar. Onlar xalq qarşısında mənəvi məsuliyyət daşıyırlar. Hərəkətləri cinayət məsuliyyəti yaradır. Bu baxımdan cinayət məsuliyyətinə cəlb olunmalıdırlar”.