“Eldar Sabiroğlu məhkəmədə dedi ki, məni boğazımdan asmaq lazımdır”

Rüfət Səfərovun ağır cəza almasından sonra atası məhkəmədə sərt çıxış edib

Müdafiə Nazirliyinin mətbuat xidmətinin sabiq rəhbəri, YAP-ın qurucularından olan Eldar Sabiroğlunun oğlu Rüfət Səfərovun Lənkəran Ağır Cinayətlər Məhkəməsinin hökmü ilə 9 il müddətində azadlıqdan məhrum edilməsi barədə xəbər vermişdik. Sabiq müstəntiq hazırda Lənkəranda Müvəqqəti Saxlanma Təcridxanasındadır.

Yaxın günlərdə R.Səfərov 1 saylı Bakı İstintaq Təcridxanasına köçürüləcək. Müdafiə tərəfi hökmdən apellyasiya şikayəti verəcək. Şikayətə baxıldıqdan sonra isə Səfərov cəzaçəkmə müəssisəsinə köçürüləcək.

Bu barədə “Yeni Müsavat”a sabiq müstəntiqin vəkili Bəhruz Bayramov məlumat verib. Keçirilən məhkəmə prosesi ilə bağlı vəkil bunları deyib: “Hökmdən Apellyasiya Məhkəməsinə müraciət edəcəyik. Hazırda Rüfət Lənkəranda Müvəqqəti Saxlanma Təcridxanasında saxlanılır. Yaxın günlərdə o, 1 saylı Bakı İstintaq Təcridxanasına gətiriləcək. Apellyasiya şikayətimizə baxılana qədər Rüfət bu təcridxanada saxlanılacaq. Mənim narahatçılığım odur ki, məhkəmə müdafiə çıxışım olmadan hökm çıxarırsa, belə qanunsuzluqlar edirsə, hökmü də vaxtında verməsinlər, qanun da qüvvəyə minsin. İndiyə qədər vəkil olduğum müddətdə hələ belə qanunsuz hökmün şahidi olmamışdım. Əsas narahat olduğum məsələlərdən biri də budur. Mənə və müdafiə etdiyim şəxsə çıxışla bağlı imkan verilməməsi Avropa Məhkəməsinin Konvensiyasının 6-cı maddəsinə birbaşa ziddir. Ali Məhkəməyə və ardınca da Avropa Məhkəməsinə müraciət edəcəyik”.

Vəkil hökmdən sonra məhkəmədə yaşananlardan da danışdı: “Rüfət qərarı adi qaydada qarşıladı. Ayın 7-də hakimin bizimlə razılaşmadan bir gün sonraya proses təyin etməsindən sonra artıq bilirdik ki, ittiham hökmü çıxarılacaq. Hökmün hazır olduğunu da bilirdik. Şahidlərə edilən təzyiqlərdən, onların polisin nəzarəti ilə məhkəmə binasında müvəqqəti saxlanmalarından sonra qanunsuz hökmün çıxarılacağına əmin olduq. Rüfət bunlara hazır idi. Eldar Sabiroğlu hökmdən sonra öz fikirlərini deyib. Geniş açıqlama da olacaq. O, məhkəmədə dedi ki, məni boğazımdan asmaq lazımdır, 20 il xidmət etdiyim hakimiyyət adi sözə görə oğlumu həbs elətdirdi, oğlumun tankı, top-tüfəngi yoxdur, onu yolundan döndərmək istədim, alınmadı, sonra iradəsinin ziddinə getmədim. Məhkəmə o qədər qanunsuz hökm çıxardı ki, yuxarıdan sifariş olmasaydı, bu qədər qanunsuzluğa getməzdi. Sifarişli işlərə çox çıxmışam. Amma burada müşahidə etdim ki, sanki hakim təzyiq altında idi. Vəkillik barəmdə xüsusi qərar çıxartmaq istəyirdilər ki, guya məhkəmə prosesini qəsdən uzadıram. Rüfətin feysbuqda statusları var idi. Əli İnsanova qarşı yeni cinayət maddələrinin açılmasına bir hüquqşünas kimi münasibət bildirmişdi. Düşünürəm ki, hökmdə bunlar əsas rol oynadı. Rüfət yazmışdı ki, 70 yaşında bir insandır, inanmıram ki, bu cinayətləri törətsin. Həbs edilməmişdən 8-9 gün qabaq belə bir müsahibə vermişdi”.

Sabiq müstəntiqlə dostluq əlaqələri olan jurnalist Pərviz Həşimli isə “Yeni Müsavat”a hökm barədə danışarkən bunları deyib: “Rüfətə dedim ki, həssas məqamdır, hökmünü gözlə. Amma məni eşitmədi. Onu əslində həbsdən sonra tanımışam. Vətənpərvər oğlan kimi qiymətləndirirəm. O, müstəqil şəxs idi. Mən həbsdə olanda bir-iki dəfə mənə vəkil vasitəsi ilə salam göndərdi. Azadlığa çıxdıqdan sonra görüşdük, münasibətimiz yarandı. Vəkilimiz eyni şəxs idi. Bizi vəkil Bəhruz Bayramov tanış etdi. Bir-birimizi həmin vaxta qədər qiyabi tanıyırdıq. Onun fikirlərini yazdığı yazılardan oxumuşam. Görüşəndə yalnız oradan-burdan danışırdıq. Mənə vətənpərvər olan bir gənc təsiri bağışlayıb. Ümumi şəkildə söhbət edəndə deyirdi ki, ədalətsizliyə dözə bilmədim və ona görə istefa verdim. Atasına qarşı olan haqsızlıqdan gileyləndi. Deyirdi ki, atası 20 il xidmət etdi, amma ona qarşı haqsız addımlar atıldı”.

Qeyd edək ki, R.Səfərovun qayınatası Yevlax rayon icra hakimi başçısının birinci müavini vəzifəsində işləyir. O, ötən ilin dekabrında Zərdab Rayon Prokurorluğunun müstəntiqi vəzifəsindən istefa verib. Bu il yanvarın 15-də Binəqədi rayon Məhkəməsinin qərarı ilə barəsində 4 ay müddətinə həbs-qətimkan tədbiri seçilib.

Həmin qərardan məhkəməyə müraciət olunaraq, həbs qərarının ev dustaqlığı ilə əvəz olunması istənilib. Yanvarın 22-də onun müraciətinə Binəqədi rayon Məhkəməsi tərəfindən baxılıb və barəsində seçilmiş həbs-qətimkan tədbiri ev dustaqlığı ilə əvəzlənib.

R.Səfərov Cinayət Məcəlləsinin 311-ci (rüşvət alma) maddəsi ilə təqsirləndirilir.