Avropa iqtisadçıları məşhur Breaking Bad serialında təsvir olunan psixoloji modelin real həyatda da mövcud olduğunu müəyyən ediblər.
Elchi.az xəbər verir ki, alimlərin araşdırmasına görə, yalnız Danimarkada xərçəng diaqnozu alan şəxslərdə cinayət törətmə ehtimalı təxminən 14 faiz artır.
Tədqiqat 1980–2018-ci illər arasında diaqnoz qoyulmuş 368 mindən çox insanın məlumatları əsasında aparılıb və onların davranışları diaqnoz almayan nəzarət qrupu ilə müqayisə edilib.
Müşahidələr göstərib ki, diaqnozdan sonrakı ilk ildə cinayət göstəriciləri minimal səviyyədə olur. Lakin zaman keçdikcə qanun pozuntularının sayı əsas göstəricini aşır. Araşdırma müəllifləri hesab edir ki, xəstəlik xəbəri bir çox insan üçün psixoloji dönüş nöqtəsinə çevrilir və riskli qərarların qəbulunu artırır.
Xüsusilə sağ qalma ehtimalı aşağı olan xəstələrdə kriminal davranış daha çox qeydə alınıb. Qeyri-iqtisadi cinayətlərin — aqressiya və zorakılıq hallarının isə 38 faiz artdığı müəyyən edilib.
Mütəxəssislər bildirir ki, səbəb yalnız maddi çətinliklər deyil. Ölüm qorxusu, həyatın mənasının dəyişməsi və “itirəcək heç nə qalmayıb” düşüncəsi bəzi insanlarda sosial qaydalara münasibəti zəiflədir və onları riskli addımlara sövq edir.
