Çinli alimlər gənələrdən insanlara keçən və ALTNV adlandırılan yeni bir virus aşkar ediblər. 3000-dən çox xəstənin müayinə olunduğu tədqiqatda müəyyən edilib ki, bu virus qızdırma, kəskin halsızlıq, mədə-bağırsaq problemləri və trombositlərin sayının azalmasına səbəb ola bilər. Həm ALTNV, həm də gənə vasitəsilə yayılan başqa bir virusa yoluxmuş 38 xəstədən yeddisi həyatını itirib.
Elchi.az xəbər verir ki, Çində gənə sancmasından sonra qızdırma səbəbilə xəstəxanaya müraciət edən şəxslər üzərində aparılan tədqiqat zamanı əvvəllər məlum olmayan bir virus müəyyən edilib. Alimlər yeni virusu “Asiya uzunbuynuzlu gənə nayrovirusu” (ALTNV) adlandırıblar.
Tədqiqatın nəticələri sentyabrın 2-də dünyanın aparıcı tibb jurnallarından biri olan *New England Journal of Medicine* (NEJM) nəşrində dərc edilib.
3000-dən çox xəstə müayinə olunub
Alimlər gənə təmasına məruz qalmış və qızdırmadan əziyyət çəkən 3163 xəstəni müayinə ediblər. Xəstələrin 10,4%-də ALTNV RNT-si və ya IgM anticisimləri aşkar edilib.
Dabie bandavirusu (DBV) üçün testi neqativ çıxan xəstələr arasında ALTNV-yə yoluxma səviyyəsinin 15,1% olduğu müəyyən edilib.
Halsızlıq və mədə-bağırsaq problemləri üstünlük təşkil edib
Yalnız ALTNV infeksiyası olan xəstələrin 84%-də halsızlıq, 80%-də isə mədə-bağırsaq problemləri müşahidə olunub. Xəstələrin 38%-də trombositlərin sayının azalması, 36%-də isə qaraciyər və ya digər toxumaların zədələnməsindən xəbər verə bilən aminotransferaza səviyyəsinin yüksəlməsi aşkar edilib.
Tədqiqatın mühüm bir detalı ondan ibarət olub ki, yalnız ALTNV infeksiyası olan bütün xəstələr sağalıb.
Şayəstə
