İtaliyaya rəsmi səfəri çərçivəsində xarici işlər naziri Ceyhun Bayramov “Aspen Institute Italia”da keçirilən yüksək səviyyəli dəyirmi masanın işində iştirak edib.
Elchi.az xəbər verir ki, bu haqda Xarici İşlər Nazirliyinin “X” platformasındakı səhifəsində məlumat yayılıb.
Nazir “Aspen Institute Italia”-nın sədri və İtaliya Deputatlar Palatasının Xarici və Avropa İttifaqı İşləri Komitəsinin sədri QiulioTremonti, eləcə də “Aspen Institute Italia”-nın fəxri sədri, Konstitusiya Məhkəməsinin sabiq Prezidenti Giuliano Amato tərəfindən qarşılanıb.
“Aspen Institute Italia”-nın Avropa işləri üzrə Baş direktoru Marta Dassùnun sədrliyi ilə keçirilən dəyirmi masa müzakirələrinə bir çox yüksəkvəzifəli şəxslər, iş adamları, akademiklər və şirkət rəhbərləri qoşulub.
Nazir Ceyhun Bayramov tədbir iştirakçılarını Azərbaycan və İtaliya arasındakı strateji tərəfdaşlıq, regional təhlükəsizlik prosesləri, enerji əməkdaşlığı, nəqliyyat və kommunikasiya əlaqələri, habelə Cənubi Qafqaz, Mərkəzi Asiya və Yaxın Şərqdə dəyişən geosiyasi dinamika barədə məlumatlandırıb.
Sessiya regiondakı geosiyasi çağırışlara, Azərbaycanın sülh gündəliyinə, həmçinin akademik və analitik əməkdaşlığın dərinləşdirilməsi imkanlarına həsr olunmuş geniş sual-cavab bölməsi ilə davam edib.
