“Bu tədbirlərin Azərbaycan üçün xüsusi əhəmiyyəti var”

Q.İbadoğlunun sözlərinə görə, Peruda əvvəlcə dünyanın 65 ölkəsindən 150-dək vətəndaş cəmiyyəti institutlarının qatıldığı “Ödədiyini açıqla” beynəlxalq koalisiyasının qlobal yığıncağının açılış-plenar iclası olub: “Sonra isə panel toplantılarda çıxışlar etdim. Fevralın 23-də Mədən Sənayesində Şəffaflıq Təşəbbüsünün (MSŞT) köhnə tərkiblə son toplantısına qatıldım. Sonra isə dünyanın 70-dən çox ölkəsinin 1500-dək hökumət, şirkət, vətəndaş cəmiyyəti və beynəlxalq təşkilatların nümayəndələrinin qatılacağı MSŞT-nin 7-ci beynəlxalq toplantısı öz işinə bağlayacaq”.

Cənubi Amerika təəssüratlarını musavat.com-la bölüşən Q.İbadoğlu qeyd edib ki, Peruya bir-birilə əlaqəli olan iki beynəlxalq tədbirdə iştirak etmək üçün səfər edib: “Tədbirlərin hər birinin Azərbaycan üçün xüsusi əhəmiyyəti var. Birincisi, fevralın 22-23-də keçirilən dünyanın 65 ölkəsindən 150-dək vətəndaş cəmiyyəti institutlarının qatıldığı ”Ödədiyini açıqla” Beynəlxalq Koalisiyasının Qlobal Yığıncağıdır. Bu toplantıya Azərbaycan vətəndaş cəmiyyətini İqtisadi Təşəbbüslərə yardım Mərkəzinin sədri Azər Mehtiyev, Azad İqtisadiyyata Yardım Mərkəzinin sədri Zohrab İsmayıl, Bərabər İmkanlar Mərkəzinin sədri Rafiq Təmrazov və Gənclərin Atlantik Müqaviləsi Assosiasiyasının rəhbəri Zaur Əkbər təmsil edib.  Peruda olduğumuz ilk gün çox məhsuldar oldu. Mən “Ödədiyini açıqla” Beynəlxalq Koalisiyasının Qlobal Yığıncağının açılış-plenar iclasında, sonra isə panel toplantılarda çıxışlar etdim. Eyni zamanda Azərbaycanı təmsil edən vətəndaş cəmiyyəti institutları nümayəndələri bu müzakirələrdə fikirlərini bölüşdülər. Toplantıda həmçinin Avrasiya regionu üzrə “Ödədiyini açıqla” Beynəlxalq Koalisiyasının Qlobal Məsləhət Şurasına seçkilərdə iştirak etdik. Fevralın 24-25-də isə dünyanın 70-dən çox ölkəsinin 1500-dək hökümət, şirkət, vətəndaş cəmiyyəti və beynəlxalq təşkilatların nümayəndələrinin qatılacağı MSŞT-nin 7-ci beynəlxalq toplantısı keçirilir. Bu toplantıya Perunun prezidenti ilə yanaşı, dünyanın bir çox ölkələrinin hökumət başçıları da qatılır. Azərbaycanın hökumət nümayəndə heyətinə Dövlət Neft Fondunun icraçı direktoru, MSŞT Hökumət Komissiyasının sədri Şahmar Mövsümov rəhbərlik edir. Bu heyətdə MSŞT Katibliyinin əməkdaşları və Dövlət Neft Şirkətinin nümyəndəsi təmsil olunub. Azərbaycan vətəndaş cəmiyyətinin təmsilçiləri MSŞT-nin 7-ci beynəlxalq toplantısında da iştirak edir. Bu səfərim zamanı MSŞT Beynəlxalq İdarə Heyətinin köhnə tərkiblə son toplantısına qatılmışam. MSŞT Beynəlxalq İdarə Heyətinin yeni tərkibdə iclasında da iştirak edəcəm. İclasda Almaniyanı namizəd statusunda MSŞT təşəbbüsünə üzv qəbul edəcəyik. Almaniya MSŞT-nin 50-ci üzv dövləti olacaq”.