Biz, 8 jurnalist, 70-lik avropa ahılları və tüstüsüz, tozsuz, tıxacsız şəhər
Biz, səkkiz jurnalist Belçikanın paytaxtı Brüsselə qədəm basanda şəhərin havası ilıq və küləksiz idi. Saat səhər 11 radələrində havanın hərarəti 12 dərəcəydi və biz qalın geyinmişdik – palto, sırıqlı gödəkcə, poliver. Əlimizin altında papaq və şərf də vardı, amma onlara ehtiyac olmadı və rayondan şəhər yerinə gələn nəvələrinə “bala, əynini qalın elə”, – deyən baba-nənələr dəstiri, bizə müvafiq tövsiyəni verənləri qınamaqdan başqa əlimizdən bir şey gəlmədi.
Hətta axşamüstü çiskin yağış yağanda da hava çox soyumadı. Belə havalarda Bakıda adətən külək də olur və adamın zəhləsini tökür. Amma Brüsselin yağışı adama xoş gələn tipdən idi. Belə olanda şəhər daha gözəl, daha təmiz, daha səliqəli görünür. Elə insanlar da şairin sözü olmasın, “yağışın əlindən qaçıb bir küncə” havasında deyildilər, daş döşəməsi parıldayan küçələrdə yağışın altındaca gəzirdilər.
Daş döşəməli şəhər
Şəhərin küçələrinin əksər hissəsinin asfalt yox, eyniylə bizim bulvardakı kimi, daş döşəməli olması diqqəti cəlb edir. Şəhər başdan-başa daş küçələrdir. Əslində daş döşəməli küçələr də iki yer bölünür: qədimi daş küçələr, yeni daş küçələr. Qədimilər daşların nisbətən kələ-kötürlüyü ilə seçilir, yenilər isə hamısı metlax kimi eyni mişardan çıxıb deyə hamardır.
Görünür, bir çox Avropa şəhərləri kimi Brüsseldə də küçələrin örtüyünü daşdan tikmək zərurətdən doğur. Yağışda, qarda daha etibarlı olur.
Bahalı şəhər
Brüssel sadə görünsə də, bahalı şəhərdir. Burada adi qəlyanaltının qiyməti 10-15 avronu keçir. Metroda gediş haqqı 2 avrodan çoxdur, daha dəqiqi, 2,1 avrodur.
Bu şəhər əhalisinin həyat səviyyəsinin yüksək olmasından, qazanclarının çoxluğundan doğur. Brüssellilər çox qazanır, çox da xərcləyirlər.
Bununla belə, şəhərin küçələrində bizdəki qədər bahalı maşınlar görmək mümkün deyil. Ciplərin sayına görə Brüssel Milandan öndə olsa da (bu ilin iyununda Milanda iki cüt bir tək cip növlü, iri maşın görmüşdük), Bakıdan çox geridədir. Hətta Brüsselin bu xüsusda Biləcəridən də geridə olduğunu iddia etmək olar.
Bu da ondan irəli gəlir ki, sakinlərin əksəriyyətinin rifahı yaxşıdan yuxarı olan şəhərdə bahalı maşın aludəçiliyi yoxdur. Paytaxt camaatı bahalı maşınla fəxr və fors etmirlər, az yanacaq yandıran maşınları üstün tuturlar.
Tüstüsüz, tozsuz, tıxacsız şəhər
Brüsselin küçələrində, yollarında vur-həşir, tıxac, tüstü, toz yoxdur. Şəhərin böyükləri tıxac problemini saysız-hesabsız tunellər, körpülər, yol ötürücüləri ilə həll ediblər. Sürücülər də intizamlıdır, qaydalara riayət edir, küçələri “Həsənsoxdu” dəyirmanına döndərmirlər. Hər işıqforda onların hərəkətinə nəzarət edən müşahidə kameraları da var. Brüsseldəki kameralarla bizimkilərin əsas fərqi odur ki, Bakıdakılar çox iridir, Brüsseldəkilər xırda, qoz boyda.
Şəhərin mərkəzində turist seli
İndi payızdır, qışa sayılı günlər qalıb, ancaq Brüsselin mərkəzi küçələrində turist seli görmək olur. Bunu yerli sakin sayaraq, ünvan soruşduğumuz adamların ard-arda əcnəbi çıxmasından bildik. Biz isə küçələrdə dəstə ilə gəzən və hər dəqiqə adamın qarşısına çıxan asiyalılardan, afrikalılardan söz soruşmurduq, sırf avropalı görünüşü olanlardan soruşurduq və məlum olurdu ki, onlar da gəlmədir.
Bir yerdə hətta küçədə 60-70 nəfərlik turist qrupu gördük. Bunlar əksəriyyətinin yaşı 70- i keçmiş ahıl adamlar, qoca kişilər, qarılar idi, gümrah addımlarla küçəni keçirdilər. Deyəsən, fransız idilər. Jurnalist həmkarlarımızdan biri həsədlə onların arxasınca baxaraq dedi: “Bizim bu yaşdakı nənə-babalarmız evdən eşiyə çıxmır, adama da “bala, məni doxdura apar” deyilər, amma bunlar ölkə-ölkə gəzirlər”.
Memarlıq abidələri
Brüssel möhtəşəm binalarla zəngindir. Çoxlu sayda memarlıq abidələri var və hər biri diqqətlə qorunub saxlanır. Müasir üslubda dəmir və şüşə binalar tikərkən elə yerdə tikirlər ki, şəhərin simasına xələl gəlməsin.
Şəhərin mərkəzində bir bina gördüm, Qız qalasına oxşatdım və şəklini çəkdim.
Brüssel Yeni ilə hazırlaşır
Hazırda şəhər Yeni ilə hazırlaşır: küknar ağacları bəzədilib, küçələrdə işıqlardan ibarət əsrarəngiz mənzərə yaradılıb. 10-15 gündən sonra buralar daha gözəl, daha çıraqban olacaq. Təbii ki, terror qruplaşmalarının Brüsselə yağdırdıqları təhdid reallaşmasa.
Avropanın əsas siyasi mərkəzlərindən biri olan Brüsseldə təhlükəsizlik tədbirlərinə ciddi önəm verirlər, çalışırlar ki, terror qruplaşmalarının üzvləri ölkəyə sıza, təşkilatlana bilməsinlər.
Bu şəhər və ölkə haqqında təəssüratlarımızın davamı olacaq. Qeyd edək ki, səkkiz qeyri-idman jurnalisti “Anderext”-“Qarabağ” oyununda komandamıza dəstək olmaq üçün “Azersun Holdinq”in maliyyə dəstəyi ilə Brüsseldədirlər.
Xalid Kazımlı,
Brüssel
Son şərhlər