“Alternativ” Kommunikasiya və Tədqiqatlar İctimaiBirliyinin Mədəniyyət Nazirliyinin maliyyə dəstəyi ilə həyata keçirdiyi “Bookline (Book Online) – RəqəmsalKitab Klubu və Mütaliə Platforması” layihəsi uğurla başa çatıb.
Elchi.az xəbər verir ki, layihənin yekun tədbiri Səbail rayon MKS-nin Mərkəzi Kitabxanasında təşkil olunub.
Tədbirdə millət vəkili Elçin Mirzəbəyli, müxtəlif ali təhsil müəssisələrinin tələbələri, ictimai fəal gənclər və ədəbiyyatsevərlər iştirak ediblər.
Layihənin rəhbəri Jalə Sabirqızı çıxışında bildirib ki, “Bookline” ideyası oxu vərdişlərinin zəiflədiyi bir dövrdə kitabı yenidən gündəmə gətirmək məqsədiilə yaranıb: “Biz bu layihə ilə göstərmək istədik ki, kitab yalnız kitabxanalarda deyil, rəqəmsal platformalarda da yaşaya və oxucu ilə yeni formada görüşə bilər.”
Layihənin aparıcısı Leyla Səmədova çıxışında qeyd edib ki, “Bookline” onun kitabla olan münasibətinin səsə, görüntüyə çevrilmiş halıdır. “Bu layihə boyunca biz müəlliflərlə oxucular arasında məsafəni azaltdıq, kitab haqqında danışmağı daha canlı və əlçatan etdik. Bu müddətdə formalaşan mühit onu göstərdi ki, gənclərin ədəbiyyata marağı var, sadəcə doğru yanaşma və platforma lazımdır.”
“Bookline”nın ilk həmsöhbəti olan millət vəkili, şair, ictimai fikir adamı Elçin Mirzəbəyli isə mütaliənin cəmiyyətin inkişafındakı roluna diqqət çəkərək bildirib ki, kitab oxumayan toplum düşünən, analiz edən və qərar verən cəmiyyətə çevrilməkdə çətinlik çəkir: “Oxu mədəniyyəti yalnız fərdi inkişaf məsələsi deyil, bu, birbaşa olaraq cəmiyyətin intellektual səviyyəsini müəyyənləşdirən əsas amillərdəndir. Belə təşəbbüslər gəncləri kitaba yaxınlaşdırmaqla yanaşı, onların dünyagörüşünün formalaşmasına ciddi töhfə verir.”
Digər çıxış edənlər layihənin əhəmiyyətindən bəhs edərək qeyd ediblər ki, “Bookline” müasir dövrdə azalan mütaliə vərdişlərinin yenidən canlandırılması, kitabın gündəlik həyatın ayrılmaz hissəsinə çevrilməsi baxımından mühüm təşəbbüslərdən biri olub. Layihə çərçivəsində təşkil olunan podkastlar, müzakirələr və onlayn platforma vasitəsilə oxucularla müəlliflər arasında birbaşa ünsiyyət qurulub, gənclərin ədəbiyyata marağı artırılıb. Bildirilib ki, “Bookline” yalnız bir layihə kimi deyil, həm də davamlı bir oxu mədəniyyəti hərəkatı kimi yadda qaldı. Müxtəlif janrları əhatə edən müzakirələr, tanınmış yazıçı və şairlərin iştirakı ilə keçirilən görüşlər iştirakçılar üçün yeni baxış bucaqları yaradıb. Həmçinin, layihə müddətində əldə olunan nəticələr yüksək qiymətləndirilərək, bu cür təşəbbüslərin davamlılığının vacibliyi vurğulanıb.
Qeyd edək ki, “Bookline” layihəsinin əsas məqsədi rəqəmsal alətlərin imkanlarından istifadə etməklə mütaliə mədəniyyətinin təşviqi, xüsusilə gənclər arasında oxu vərdişlərinin formalaşdırılması və inkişaf etdirilməsi olub.
