BMT: Ukraynada 2 milyondan çox insan evini tərk etməli olub

Rusiyanın Ukraynaya hücumu nəticəsində iki milyondan çox insan evini tərk etmək məcburiyyətində qalıb.
Elchi.az-ın xəbərinə görə, bu barədə BMT İnsan Hüquqları Şurasının 9-cu sessiyasında BMT-nin İnsan Hüquqları üzrə Ali Komissarı Mişel Baçelet çxışında bildirib.
“BMT QAK-ın hesablamalarına görə, bir milyon insan məcburi köçkün vəziyyətinə düşüb. Daha 1.040.000 qaçqın son yeddi gündə qonşu ölkələrə keçib – əksər hallarda günlərlə velosipedlə və ya piyada soyuq havada yol gediblər. BMT QAK-ın hesablamalarına görə, qarşıdurma davam edərsə, yaxın həftələrdə dörd milyona qədər insan ölkəni tərk edə bilər.
Mən ölkəni tərk edən ukraynalıları qəbul etməyi yüksək qiymətləndirirəm. Bu xoş qarşılanma vətəndaşlığından, etnik mənsubiyyətindən və ya digər statusundan asılı olmayaraq, münaqişədən xilas olmağa çalışan bütün insanlara şamil edilməlidir. Afrika və Asiya vətəndaşlarına qarşı ayrı-seçkiliyin narahatedici əlamətləri var və Ofismiz bu vəziyyəti diqqətlə izləyəcək”, o deyib.
BMT komissarı bildirib ki, hazırda on milyonlarla insan ölkədə potensial ölüm təhlükəsi altında qalır. “Minlərlə insan, o cümlədən yaşlılar, hamilə qadınlar, uşaqlar və əlillər partlayışlardan xilas olmaq üçün yeraltı sığınacaqlara və metro stansiyalarına sığınmağa məcbur olub. Ukraynadakı heyətimlə Rusiya qoşunlarının irəliləyəcəyi təqdirdə təqib olunacağından narahat olan bir neçə qrup, Ukraynadakı Krım tatar icmasının üzvləri, eləcə də tanınmış hüquq müdafiəçiləri və jurnalistlər əlaqə saxlayıb”, Baçelet bildirib.