Azərbaycan Beynəlxalq Maarif Məktəblərinin (ABMM) açılış mərasimi keçirilib. Tədbirdə elm və təhsil naziri Emin Əmrullayev, Türkiyənin Azərbaycandakı səfiri Cahit Bağçı, Azərbaycan Milli Məclisinin deputatları, Türkiyədən və Azərbaycandan qatılan digər qonaqlar iştirak ediblər. Qeyd edilib ki, Türkiyə Maarif Vəqfi 17.06.2016-ci ildə TBMM tərəfindən 6721saylı qanunla qurulan və xaricdə Türkiyə Cümhuriyyəti adından təhsil müəssisələri açma səlahiyyətinə malik dövlət qurumudur.
Yeni tədris ilindən etibarən isə Azərbaycanda ilk dəfə olaraq Beynəlxalq Maarif Məktəbləri təhsil fəaliyyətinə başlayıb. Doqquz min kv. metrlik geniş yaşıllıq sahəni əhatə edən təhsil müəssisəsi, iki mühafizə, bir inzibati və dörd tədris binalarından ibarətdir. Məktəb ağıllı lövhələrlə quraşdırılmış sinif otaqları, laboratoriyalar, emalatxanalar, idman zalı, konfrans zalı və yeməkxana ilə təmin olunub. Beynəlxalq Maarif təhsil standartına əsasən məktəbəqədər, ibtidai, orta və tam orta təhsil imkanları təklif edən təhsil müəssisəsində, əsas fənnlər ilə yanaşı, dərsdənkənar məşğələlər də keçiriləcək.
Beynəlxalq Maarif Məktəblərinin təhsilimizə gətirəcəyi yeniliklər barədə Elchi.az-a açıqlama verən təhsil üzrə ekspert Kamran Əsədov bildirib ki, qardaş Türkiyənin çox qədim və zəngin təhsil təcrübəsi var. Türkıyə maarif fondu (Türkiye aydınlanma vakfı) Azərbaycanda təhsıl müəssisələrinin açılması çox böyük hadisədir:
“Əvvəlki təcrübədən də görürük ki, Fond Azərbaycanda öz məktəblərini açmağa və Azərbaycan xalqına dünya standartlarına cavab verən yüksək keyfiyyətli təhsil almaq imkanları yaratmağa çalışır.
Məndə olan məlumata görə Azərbaycan Türkiyə Maarif Fondunun məktəblərinin fəaliyyət göstərəcəyi 44-cü ölkə olacaq. Bakıda yeni məktəbdə təhsil prosesi 12 illik təhsil proqramına əsaslanacaq. Bu imkan verəcək ki, bu məktəbin məzunları rahatlıqla təhsillərinin dünyanın nüfuzlu universitetlərində davam etdisin.
Vakfın əvvəlki təcrübəsindən deyə bilərəm ki, Məktəblər beynəlxalq tələblərə uyğun olacaq. Təhsil haqqında müəyyən beynəlxalq sertifikatlar var. Əlbəttə, onların alınması üçün vaxt tələb oluna bilər. Demək istəyirəm ki, Türkiyə Maarif Fondunun təhsil strategiyasının əsası ayrı-ayrılıqda götürülmüş hər bir ölkənin gözləntilərinə uyğun olaraq keyfiyyətli kadrların hazırlanmasıdır. Fond ilk növbədə yerli standartları və milli xüsusiyyətləri nəzərə alır. Bu məktəblərin açılması ölkələrlə münasibətlərin yaxşılaşdırılması və onların inkişafına töhfədir.
İnanıram ki, bu məktəb də digər təhsil müəssisələrimiz kimi öz sözünü deyə biləcək. Məktəbdə STEAM, robotik kodlama, kompüter laboratoriyası kimi informasiya və texnoloji biliklərin təkmilləşdirilməsinə xidmət edən sahələrin tədrisinə xüsusi diqqət yetirilir. Ana dilində tədris imkanları təklif edən təhsil müəssisəsində türk, ingilis, rus və ispan dillərinin də akademik səviyyəyədək öyrədilməsi hədəflənir ki, bu da ölkəmizdə təhsil mühitində yeni rəqabət mühiti yaradacaq.
Məlumdur ki, Türkiyə təhsili qabaqcıldır, müasir dünya trendləri ilə ayaqlaşır. Ümumiyyətlə, Türkiyədə təhsil sistemi çox yaxşı qurulub. Açılacaq yeni məktəblərdə təlim-tədris proqramına hazırda dünya üzrə ən çox tələbat olan fənlərə üstünlük verilməsi də bunu göstərir. STEAM, robotik kodlama, kompüter laboratoriyası kimi informasiya və texnoloji biliklərin mənimsənilməsinə üstünlük veriləcək. Dərslər Beynəlxalq Maarif tədris Proqramına əsasən həyata keçiriləcək. Sonrakı mərhələdə Azərbaycan, xarici və Türkiyə ali təhsil müəssisələrinə müraciət zamanı da imtahanlara uyğun proqramlar da təşkil olunacaq. Dərslər IELTS/TOEFL/SAT kimi beynəlxalq dərəcəli sertifikat imtahanlarına uyğun keçiriləcək. Bu, şagirdlərə əlavə üstünlüklər verir. Məsələn, türk dilindən bilik səviyyəsi B2 olan şagirdlərə Türkiyədə təqaüdlə təhsil imkanları təklif olunur. Bundan başqa “Maarif” məzunları Türkiyənin dövlət universitetlərinə daxil olduğu zaman təhsil haqqından tamamilə azad edilirlər. Bunlar hamısı Azərbaycan təhsilinin, azərbaycanlı balaların əvvəlcə yüksək səviyyəli ibtidai, sonra orta, daha sonra ali təhsil almaları üçün böyük imkandır. Hazırda dünyada öndə gedən ixtisaslar robotik kodlama, proqramlaşdırmadır. Sözsüz ki, Beynəlxalq Maarif Məktəbləri də bunu nəzərə alaraq Azərbaycana gəlir. Çox yaxşı, müsbət haldır ki, bu məktəblərin Azərbaycanda fəaliyyətinə “yaşıl işıq” yandırılıb. Bu məktəblər Azərbaycan təhsilinə yenilik və rəngarənglik gətirəcək. Təhsil belə də olmalıdır: rəngarəng və daim yenilənən. Çünki həyat bir yerdə dayanmır, daim hərəkətdədir, daim təzələnir, yenilənir. Hazırda dünya universitetlərində bilik yox, bacarıqlar yoxlanır. Xarici dil bilirsənmi, işini planlaşdırma qabiliyyətin necədir, işini necə avtomatlaşdırırsan, alqoritmik təfəkkürün necədir, kodlaşdıra bilirsənmi, texnoloji biliklərin hansı səviyyədədir.
Robotik kodlaşdırma, bir növ proqramlaşdırmanın əsasıdır. Dünya universitetlərində hesab edirlər ki, bunları bilən insan digər fənləri onsuz da mənimsəyə biləcək. Əsas texnoloji biliklərə, insan nə dərəcədə yaradıcıdır, ona diqqət yetirilir və süni intellektə üstünlük verilir. Əvvəllər İstanbulda az qala hər addımda ingilis, fransız dili kursları önünə çıxardı. İndi isə kodlaşdırma kursları açılır. Müasirliklə ayaqlaşmaq mütləqdir. Gərək geri qalmayasan. Ümid edirəm ki, Beynəlxalq Maarif Məktəblərinin ölkəmizdə fəaliyyətə başlaması ilə Azərbaycan təhsili də dünya təhsilinə güclü bir şəkildə inteqrasiya edəcək. Bizim təhsilimiz də dünya təhsil sistemi ilə ayaqlaşacaq. Bu, bizim üçün böyük üstünlükdür. Gənclərin dünyanın qabaqcıl ali məktəblərinə yolu açılacaq. Nəticədə ölkəmiz müasir biliklərə yiyələnmiş istedadlı kadrlar əldə edəcək”.
Yeganə