Bilməzdin, dünyanın dönük çağı var,
Bilməzdin, qan tökən düşmən, yağı var.
Artıq ürəyində oğul dağı var,
Mərd çəkdin, yenə də mərd çək bu yası-
Başını uca tut, şəhid Anası!
Azərbaycanın ərazi bütövlüyü uğrunda gedən döyüşlər zamanı əziz canından keçən oğulların sırasında Beyləqan rayonunun Yuxarı Aran kənd sakini Sirac Əhməd oğlu Mehdiyevin də adı fəxrlə çəkilir. O, 1974-cü il iyulun 11-də anadan olmuşdu. Ailədə 4 qardaş, 2 bacıydılar. 1992-ci ilin yayında rayon hərbi komissarlığının çağırışı əsasında yeni formalaşan Azərbaycan Ordusunun tərkibində, Qubadlı bölgəsindəki “N”saylı taborun tərkibində “Qorxmazçılar”bölüyündə həqiqi hərbi xidmətə başladı. 125 gənc əsgərin içərisində ilk hərbi formanı Sirac geyindi.Hər işdə 1-ci olmağa çalışırdı.
Ermənistan Silahlı Qüvvələri, öz silahdaşlarının köməyilə 1992-ci il dekabrın 10-da Azərbaycanın tabeçiliyində olan Zəngilan, Qubadlı və Laçın istiqamətlərində hücuma başladılar. Qeyri-dəqiq məlumatlara görə, Rusiyanın “Alfa”
qrupu bu hücumlar zamanı əsl canfəşanlıq edirdi.
Cəsur komandir, məlahətli səsilə könülləri oxşayan Həsənqulu Qasımovun rəhbərliyi altında Yuxarı Cibiklinin müdafiəsində dayanan nər biləkli oğullar düşmənlə əlbəyaxa döyüşə girdilər. Bu zaman düşmən tərəfdən 15-dən çox zabit və əsgər, Azərbaycan tərəfdən isə 1 zabit, 4 əsgər və 2 nəfər kənd sakini şəhid oldu. Şəhid olanların arasında Həsənqulu(Qorxmaz) Qasımov, Sirac Mehdiyev, Rəfail Qaybalıyev, Tərlan, Əhməd kimi oğullar da vardı.
Siracın dəfni yüksək səviyyədə təşkil edildi.
İndi vaxtilə oxuduğu məktəb onun adını daşıyır.
2015-ci il yanvarın 20-də Sirac Mehdiyevin döyüşçü dostları, onu yaxından tanıyanlar anası Məryəm xanımın evində qonaq oldular. Ananın sevincinin həddi-hüdudu yox idi. Təhmasib Quliyev, Zaur Ağakişiyev, Əvəz Almədətov, Qurban Qurbanov… Siracla bağlı xoş xatirələrini danışdılar. Qərara alındı ki, bu il mayın 9-da şəhid eloğlumuzun adını daşıyan Yuxarı Aran kənd orta məktəbində bu kəndin 12 şəhid oğlunun, xüsusən də, S.Mehdiyevin anım mərasimi keçirilsin.
Şamil Sabiroğlu,
“Xocalı Soyqırımını Tanıtma”ictimai birliyinin sədri, “Yeni Yurd”Sosial İnkişaf ictimai birliyinin İcraçı direktoru,
Fotolar Əvəz Almədətovundur.
Son şərhlər