Bakıda Ümumdünya Turizm Günü qeyd olunub
Sentyabrın 27-də Bakıda Ümumdünya Turizm Gününə həsr olunmuş bir sıra tədbirlər keçirilib.
AzərTAc xəbər verir ki, Mədəniyyət və Turizm Nazirliyinin dəstəyi ilə Qız qalasının yanında “Cəngi” caz qrupunun konserti olub. Kollektivin bədii rəhbəri Əməkdar Artist Mircavad Cəfərovdur. Qrupun ifasında Q.Qarayev, A.Məlikov, V.Motsart, F.Şopen, D.Gillespi və başqa bəstəkarların əsərləri səsləndirilib.
Fəvvarələr meydanında və Filarmoniya bağında da müxtəlif estrada ifaçılarının konsertləri olub.
Artistlərin çıxışları bakılılar və şəhərin qonaqları tərəfindən böyük maraqla qarşılanıb.
