Bakıda Türkiyənin 15 İyul – Demokratiya və Milli Birlik Günü münasibətilə anım tədbiri keçirilib.
Elchi.az xəbər verir ki, tədbirdə Türkiyənin Azərbaycandakı səfiri Birol Akgül, Səfirliyin əməkdaşları, Milli Məclisin deputatları və digər rəsmilər iştirak edib.
Tədbir Azərbaycan və Türkiyə Dövlət himnlərinin səsləndirilməsi və şəhidlərin xatirəsinin anılması ilə başlayıb.
Çıxış edən Türkiyənin Azərbaycandakı səfiri Birol Akgün deyib ki, Türkiyə dövlət və millət birliyi ilə 15 iyul çevrilişinə cəhd edən FETÖ terror qruplaşmasına qarşı mübarizəsini hər zaman davam etdirəcək:
“Son dövrlərdə təşkilat daxilindən gələn yeni ifşalar da bu qaranlıq və sektaya bənzər quruluşun əsl simasını bir daha açıq şəkildə ortaya qoyub. FETÖ yalnız təbliğatla deyil, gizli planlar, aldatma və casusluq üsulları ilə fəaliyyət göstərən təhlükəli bir təşkilatdır. Unudulmamalıdır ki, bu quruluşun yeganə hədəfi Türkiyə deyil”.
Səfir ilk andan etibarən Türkiyə dövlətinin və xalqının yanında olduğunu ifadə edən Prezident İlham Əliyevə və Azərbaycam xalqına minnətdarlığını bildirib.
Milli Məclisin Azərbaycan-Türkiyə parlamentlərarası əlaqələr üzrə işçi qrupunun rəhbəri Əhliman Əmiraslanov isə həmin tarixdə baş verənləri Türkiyə dövlətinin və xalqının qəhrəmanlıq salnaməsi adlandırıb:
“O günləri xatırlayıram, Azərbaycan xalqı ayağa qalxmışdı. Xalq və dövlət birliyi yumruq şəklində birləşdi və bu cəhd iflasa uğradı”.
Deputat da öz növbəsində sözügedən proseslər zamanı Azərbaycan dövlətinin və xalqının Türkiyə dövlətinin və xalqının yanında olduğunu qeyd edib.
Daha sonra Türkiyə Prezident Aparatının Kommunikasiya İdarəsinin rəhbəri Burhanəddin Duranın videomüraciəti nümayiş olunub.
“Bu gün biz FETÖ-nün izlərini dövlətimizdən və ölkəmizdən silmişik. Bu gün Türkiyənin beynəlxalq səviyyədə ekstradisiyasını tələb etdiyi FETÖ üzvləri müxtəlif ölkələrdə yaşayır və bəzi hallarda dəstək görürlər”,- deyə Burhanəddin Duran videomesajında qeyd edib.
Burhanəddin Duran Türkiyənin dostu olan və bu dostluğu qarşılıqlı şəkildə inkişaf etdirmək istəyən bütün ölkələrə çağırış edib:
“Xalqımızın suverenliyini və demokratiyamızı hədəfə alan qurumlara qarşı dostlarımızın bizimlə həmrəylik nümayiş etdirməsini və vəfa hissi ilə davranmasını gözləyirik. Çünki FETÖ yalnız Türkiyəni maraqlandıran milli təhlükəsizlik problemi deyil. Bu təşkilat fəaliyyət göstərdiyi hər bir ölkə üçün açıq təhlükə mənbəyidir. Müxtəlif coğrafiyalarda yaşasaq da, eyni problemlərlə qarşılaşdığımızı dərk etməli və qlobal çağırışlara birgə həll yolları tapmalıyıq”.
Çıxışlardan sonra 15 iyul gecəsi həlak olanların xatirəsi anılıb.
