“Neftçilər” metrostansiyasının çıxışında yaşıllığı məhv edib obyekt tikirlər; Babək Tatlıyev: “Bizdə elə bir məlumat yoxdur”
Paytaxtın Nizami rayonunda, “Neftçilər” metrostansiyasının çıxışında yeni obyekt tikilir. Bu obyekt xeyli yaşıllığın məhv edilməsi hesabına inşa olunur. Ətrafda yerləşən ağaclar qırılaraq məhv edilir.
Hadisə yerində olduğumuz zaman kəsinti işləri dayandırılmışdı. Satıcılar və ətrafda yaşayan sakinlər ağacların kəsilmə səbəbinin məlum olmadığını bildirdilər. Onu da qeyd etdilər ki, kəsinti işi 1 saat ərzində başa çatdırılıb. Apardığımız müşahidələr zamanı kəsilən ağacların izinin itirilməyə cəhd olunduğu, lakin buna nail olunmadığı açıq-aşkar görünürdü. Ərazidə təxminən 10-a yaxın şam və küknar ağacları kəsilib.
Nizami rayon İcra Hakimiyyətinin təsərrüfat şöbəsinin müdiri Babək Tatlıyev baş verənlərdən xəbərsiz olduqlarını bildirib. Şöbə müdiri “Yeni Müsavat”a deyib ki, onlarda ağacların qırılması haqda məlumat yoxdur: “İndi gedib yerində araşdıracam. Bildiyimə görə, orada ağac kəsilməməlidir”.
Onu da qeyd edək ki, “Neftçilər” və “Xalqlar dostluğu” metrostansiyalarının kəsişməsində yerləşən şam ağaclarından ibarət yaşıllıq zolağında da ağacların məhv edildiyi müşahidə olunur. Yaşıllıq zolağına daxil olan zaman kəsilən, yaxud yerə yıxılan ağaclara rast gəlmək olur. Hər bir ağacın kökünün yandırıldığı görünür. Ətrafdan sıx görünən meşəlik əslində qalsa, daxildən ciddi şəkildə seyrəlir.
İcra hakimiyyətinin rəsmisi Babək Tatlıyev bu məsələyə də aydınlıq gətirdi: “Bu şam ağaclarından ibarət meşəlik daim nəzarətdədir. Həm Bakı Şəhər Yaşıllaşdırma İdarəsi, həm İcra Hakimiyyəti, həm də Ekologiya və Təbii Sərvətlər Nazirliyi bu meşəliyə xüsusi olaraq, nəzarət edir. Bir dəfə komissiya yaradaraq, ağacların siyahıya alınmasını təşkil etmişik. Hər bir ağac nömrələnib. Ağacların kəsilməsinin qarşısını almaq üçün belə bir addım atılıb. Konkret belə bir fakt aşkarlansa, dərhal tədbir görülərək, kəsilən ağacın yerinə yenisi əkiləcək. Bu ərazi paytaxtda nadir meşələrdəndir. Ona görə də, aidiyyatı qurumların daimi nəzarətindədir”.
Son şərhlər