WNT siqnal yolundakı genetik səhvlər bağırsaq və qaraciyərdə hüceyrələrin nəzarətsiz çoxalmasını stimullaşdıra bilər.
Elchi.az xəbər verir ki, bu nəticə Qlazqo Universitetinin Nature Genetics jurnalında dərc olunan yeni tədqiqatında göstərilib. Alimlər müəyyən ediblər ki, niyə eyni mutasiyalar bütün orqanizmdə deyil, yalnız müəyyən toxumalarda xərçəngə səbəb olur.
Əsas mexanizm hüceyrədə zülal sintezini tənzimləyən nukleofosmin (NPM1) adlı zülalla bağlıdır. Normal yetkin toxumalarda bu zülal kritik rol oynamır, lakin bağırsaq xərçəngi və qaraciyər xərçənginin bəzi növlərində onun səviyyəsi kəskin artır. WNT yolundakı mutasiyalar şiş hüceyrələrinə adətən hüceyrələrə nə vaxt bölünməməli olduqlarını bildirən siqnal sistemini “ələ keçirməyə” imkan verir. Nəticədə hüceyrələr nəzarətsiz çoxalmağa başlayır və şiş əmələ gəlir.
“Tədqiqat göstərir ki, əgər NPM1 bloklanarsa, xərçəng hüceyrələri zülalları effektiv sintez etmək qabiliyyətini itirir, bu isə şişə qarşı təbii mexanizmləri aktivləşdirir və şişin böyüməsini ləngidir”, — deyə araşdırmanın rəhbəri, professor Ouen Sənsom bildirib.
Alimin sözlərinə görə, NPM1 yetkin toxumaların normal fəaliyyəti üçün vacib deyil, buna görə də bu istiqamətdə müdaxilə nisbətən təhlükəsiz və hədəfli ola bilər. Uzunmüddətli perspektivdə bu kəşf ənənəvi kimyaterapiyanın yan təsirlərini minimuma endirən, daha dəqiq və təhlükəsiz xərçəng müalicə üsullarının hazırlanmasına imkan verə bilər. Lakin tədqiqatçılar vurğulayırlar ki, NPM1-in bloklanmasının müxtəlif şiş növlərinə təsirini yoxlamaq üçün əlavə araşdırmalara ehtiyac var.
Məryəm
