“Azərbaycan Dəmir Yolları” QSC (ADY) cari ilin avqust ayından etibarən Birləşmiş Millətlər Təşkilatının (BMT) Qlobal Sazişinə qoşulub.
Elchi.az ADY-nin yaydığı məlumata istinadən xəbər verir ki, Qlobal Sazişə qoşulmaqla qurum hazırda nəqliyyat sahəsində dünyanın 500-ə yaxın nüfuzlu şirkətinin yer aldığı təşəbbüsdə Azərbaycanı təmsil edən ilk şirkət olub.
Dəmir yolu infrastrukturunun müasirləşdirilməsi, rahat və təhlükəsiz hərəkət təminatını hədəfləyən ADY öz fəaliyyətini qlobal dayanıqlılıq məqsədlərinə uyğunlaşdıraraq Azərbaycanın regionun əsas nəqliyyat habına çevrilməsi istiqamətində ciddi səy göstərir.
Belə ki, bu təşəbbüsə qoşulmaqla ADY ekoloji, sosial və korporativ idarəetmə (ESG) sahələri istiqamətində fəaliyyət proqramını daha da təkmilləşdirərək BMT-nin Dayanıqlı İnkişaf Məqsədlərinə, eləcə də ölkə iqtisadiyyatına töhfə verməyi planlaşdırır.
BMT-nin təşəbbüsü ilə 2000-ci ildə əsası qoyulmuş Qlobal Saziş öz üzvlərini strategiya və fəaliyyətlərini beynəlxalq səviyyədə qəbul edilmiş insan haqları, işçilərin hüquqları, ətraf mühit və korrupsiyaya qarşı mübarizə ilə bağlı prinsiplərə uyğunlaşdırmaq və “Dayanıqlı inkişaf üzrə 2030 Gündəliyi”nə töhfə verməyi təşviq edir. Saziş 160-dan çox ölkədə 20 mindən artıq biznes və qeyri-biznes tərəfdaşlarını birləşdirən dünyanın ən böyük korporativ dayanıqlılıq şəbəkəsidir.
Son şərhlər