Virtualaz.org saytı Rusiya mətbuatına istinadən xəbər verir ki, Komarovanın vəzifədə qalmasında azərbaycanlı neft maqnatı, “LUKoil” prezidenti Vahid Ələkbərovla onun arasında korrupsiya əlaqələrinin rolunun olduğu barədə məlumatlar yayılıb.

Belə ki, N.Komarovanın qubernator vəzifəsindən uzaqlaşdırılacağı gözlənilirdi. Çünki onun iş effektivliyi sual altındadır, regionda siyasi nüfuzu azalıb və reytinqini itirib. Buna baxmayaraq Komarova vəzifəsində qala bilib.

Xantı-Mansiyskin müxalif çevrələrində əmindirlər ki, Natalya Komarovanın səlahiyyətlərinin uzadılması məhz “LUKoil” prezidentinin sayəsində mümkün olub.

Vahid Ələkbərov və Natalya Komarova

Məlumatlara görə, Vahid Ələkbərovun çoxdankı rəqibi, Kremlin “boz kardinalı” hesab olunan “Rosneft” prezidenti İqor Seçin regiona öz adamını qubernator təyin etdirmək istəyib. Ötən həftə sonu Komarova gözlənilmədən Moskvaya uçub və “Rosneft” rəhbəri ilə görüşüb. Bu görüşdə Xantı-Mansiyskdə yaxınlaşan seçkilər müzakirə olunub.

Bildirilir ki, Seçin Komarovaya lazımi dəstək verməyib və məlumatlara görə, qubernator vəzifəsinə Eduard Xudaynatovun namizədliyinin xeyrinə lobbiçilik edib. Xudaynatov “Rosneft”in keçmiş prezidentidir.

Məlumatlara görə, Seçinlə Komarova arasında münaqişə regiondakı Qavrikovsk neft yatağı üstündə yaranıb.

İqor Seçin və Eduard Xudoynatov

Digər məlumata görə, Komarovanı təkcə Seçin yıxmaq istəmirdi, “Qazprom”un da onun yerinə öz namizədi var idi. “Qazprom” öz törəmə şirkətlərindən birinin direktoru Pavel Zavalnının qubernator təyin edilməsinə çalışıb və Kremldə onun xeyrinə lobbiçilik edib. Lakin bu mübarizədə Vahid Ələkbərovun dəstəklədiyi Komarova qalib gəlib.

Ekspertlərin qənaətinə görə, bu, Ələkbərovun Kremldə və şəxsən Putinin yanında artan nüfuzu ilə bağlıdır.

Xantı-Mansiyskdə hesab edirlər ki, V.Ələkbərovun N.Komarovanı himayə etməsinin arxasında korrupsiya maraqları dayana bilər. Çünki Komarova “LUKoil”un maraqlarını fəal şəkildə dəstəkləyir, ötən həftə sonu Putinlə görüşündə də “LUKoil”un işini tərifləyib. Üstəlik bu yaxınlarda “LUKoil” şirkətini vergidən yayınmaq üçün inzibati rıçaqlardan istifadədə ittiham ediblər. Çünki Xantı-Mansiysk vilayətinin deputatları neft sənayesində vergi rejiminin yumşaldılması üçün Dövlət Dumasına qanun layihəsi veriblər.

Ötən ilin yayında isə Federal Antiinhisar Xidmətinin region üzrə idarəsi “LUKoil”un antiinhisar qanunvericiliyini pozması ittihamı ilə araşdırma başlatmışdı. Xantı-Mansiyskin müxalifət çevrləri iddia edir ki, Vahid Ələkbərov nəinki Komarovanın qubernator vəzifəsində qalmasına lobbiçilik edib, hətta hakim Vahid Rusiya Partiyasının fonduna sanballı məbləğ ödəyərək onun postunu satın ala da bilərdi.