Siyasi və iqtisadi ekspertlərin fikirləri fərqlənir
Neftin sürətlə ucuzlaşması büdcəsi xeyli dərəcədə neftdən asılı olan Azərbaycanı da çətin vəziyyətlə üzləşdirib. Ekspertlərə görə, manatın dollara nisbətdə öz dəyərini növbəti dəfə itirmək təhlükəsi ilə qarşılaşması, qida məhsullarının bahalaşması, ölkədəki iqtisadi proseslərin əvvəlki kimi getmədiyinin göstəricisidir.
Bu arada AXCP sədri Əli Kərimli də apardığı kiçik təhlil əsasında Azərbaycanın çox ciddi sosial-iqtisadi böhrana girdiyini söyləyib.
Bu barədə o, facebook-dakı statusunda yazıb. O, bu xüsusda yalnız son 4 iş günü ərzində Mərkəzi Bankın valyuta rezervlərinin 10 faizdən çoxunun (8 milyard 501 milyon 500 min dollardan 893 milyon dolları) xərcləməsinə diqqət yönəldib.
İqtidar nümayəndələri isə ölkədəki vəziyyəti, sadəcə, müvəqqəti iqtisadi gərginlik adlandıraraq, öz çıxışlarında “iqtisadi böhran” termini işlətməkdən yayınırlar. Bəs
Azərbaycandakı iqtisadi durumun adı nədir?
Məsələ ilə bağlı musavat.com-a danışan iqtisadi ekspert Natiq Cəfərli bildirib ki, hazırda ölkə iqtisadiyyatı həqiqətən də böhran astanasındadır: “Böhranın astanasında olsaq da, bununla bağlı ciddi fəsadları növbəti aylarda görəcəyik. Çünki indiki situasiyanın arxasınca işsizliyin artması müşahidə olunacaq. Bununla da əhalinin sosial vəziyyəti ağırlaşacaq. Artıq bunun üçün zəmin var. Ölkədə tikintilər dayanır, kiçik və orta biznesin fəaliyyət dairəsi daralır. Eyni zamanda dövlət və hökumət orqanlarında ciddi ixtisarlar gözlənilir. 2016-cı il büdcəsinin müzakirələrində şahidi olacağıq ki, hökumət məcburən bəzi xərclərin kəskin şəkildə azaldılmasına gedəcək. Mənzil bazarında satışlar demək olar ki, dayanıb. Bu da tikinti sektoruna təsir göstərir. Avtomobil və mobil telefon bazarlarında da ötən illə müqayisədə xeyli azalmalar var. Hətta geyim mağazaları artıq bağlanır. Bütün bunlar isə onu deməyə əsas verir ki, biz böhranın astanasından içəri addım atmışıq. Ciddi fəsadları isə bir neçə ay sonra görəcəyik. Banklardakı problemləri də nəzərə alsaq, Azərbaycanda iqtisadi vəziyyətin böhranlı hal aldığını hiss edəcəyik”.
Musavat.com-a danışan digər iqtisadi ekspert Oqtay Haqverdiyev isə hesab edir ki, Azərbaycandakı vəziyyəti böhran adlandırmaq doğru deyil: “Böhran Rusiyadadır. Özü də dərin böhrandır. Azərbaycanda böhrandır demək doğru olmaz. Əgər büdcəni və ya maliyyə bazarını götürsək, burada müəyyən problemlər var. Ancaq bunu böhran hesab etmək olmaz. Çünki Azərbaycanda inflyasiya aşağıdır. Eyni zamanda ümumi daxili məhsulda artım var. Makroiqtisadi göstəricilərin yüksək olduğu məqamda ölkədə böhran var söyləmək doğru olmaz”.
Son şərhlər