Antibiotik müalicəsinin şəkərli qidaların istehlakı ilə birləşdirilməsinin bağırsaq mikrobiomuna zərər verə biləcəyi və insanları təhlükəli infeksiyalara qarşı həssas vəziyyətə sala biləcəyi bildirilir.
Elchi.az xəbər verir ki, *Nature* jurnalında dərc olunan yeni bir araşdırmada, kök hüceyrə transplantasiyasından əvvəl uzunmüddətli antibiotik müalicəsi alan xəstəxanadakı xərçəng xəstələrinin bağırsaq bakteriyalarındakı dəyişikliklər tədqiq edilib.
Xərçəng müalicəsi alan xəstələr yalnız xəstəxana tərəfindən hazırlanan qidaları qəbul etdikləri üçün tədqiqatçılar onların hansı növ və miqdarda qida maddələri qəbul etdiklərini dəqiq izləyə biliblər. Bağırsaq mikrobiomunun həzmə kömək etmək, vitaminlər istehsal etmək, immun sistemini dəstəkləmək və serotonin kimi neyrotransmitterlərin istehsalında rol oynamaq üçün beyinlə əlaqə saxlamaq kimi mühüm funksiyaları yerinə yetirdiyi məlumdur.
Xəstəxanada yatan xəstələr üzərində aparılan araşdırma
“Memorial Sloan Kettering” Xərçəng Mərkəzi, “NYU Langone Health” və “City of Hope” Xərçəng Mərkəzinin alimlərinin rəhbərlik etdiyi araşdırmada tədqiqatçılar 173 xəstəyə aid 1000-dən çox nəcis nümunəsini və 9400-dən çox xəstəxana yeməyini təhlil ediblər.
Tədqiqat qrupunun üzvü Dr. Conatan Peled bildirib ki, onlar xüsusi qidaların və yağlar, karbohidratlar və liflər kimi əsas qida maddələrinin bağırsaq bakteriyalarına təsirini təhlil ediblər.
Peled qeyd edib ki, şəkərli qidalar — növündən asılı olmayaraq və xüsusilə də tərkibində əlavə şəkər olanlar — antibiotiklərlə birlikdə qəbul edildikdə mikrobioma ciddi mənfi təsir göstərir.
Şayəstə
