Akif Çovdarovun daha bir müdhiş cinayəti üzə çıxdı- sensasion təfərrüatlar

Hazırda Akif Çovdarov və onun birbaşa tabeliyində olmuş 4 şöbə rəisi məhkəmə qarşısına çıxarılıblar. Odioz general və onun əlaltıları ümumilikdə 54 epizod üzrə ittiham olunurlar. Epizodların mütləq əksəriyyəti hədə-qorxu ilə tələb etmə cinayəti ilə əlaqədardır. Yəni Çovdarov və əlaltıları sahibkarların başlarına torba keçirib oğurlamaqla onlara hədə-qorxu gəlib var-dövlətlərini əllərindən alıblar. Tələb olunan pulu, var-dövləti, obyekti, bazarı, holdinq və s. vermək istəməyənlər dəhşətli işgəncələrlə, zorakılıqlarlarla, şantajla üz-üzə qalıblar. Akif Çovdarov və əlaltılarının caynağına keçən sahibkarlardan sağlıqlarını itirən, ömürlük şikəst qalan və həyatlarını itirənlər olub.

MTN çetesinin ifşasından ötən 11 ay ərzində yeni-yeni cinayətləri üzə çıxmaqdadır. Redaksiyamıza etibarlı mənbədən daxil olan məlumata görə Akif Çovdarov Bakıda fəaliyyət göstərən tikinti şirkətlərindən biri, “Altes-qrup”a da sahiblənmək üçün çox ciddi planlar qurub. Bu işdə hazırda Dubayda gizlənən, MTN çetesində “Akula Polad” kimi tanınan Polad Qabulov əsas fiqur olub. Artıq Yasamal Rayon Polis İdarəsinin İstintaq Şöbəsində bu cinayətin bütün iştirakçılarını müəyyən ediblər.

Əldə etdiyimiz özəl məlumata görə hələ 2011-ci ildə Polad Qabulov barəsində Yasamal Rayon Polis İdarəsinin icraatında bu cinayətlə əlaqəli cinayət işi olub. Lakin həmin dövrdə P.Qabulov güclü himayəçisi, o dövrdə kölgədə qalan Akif Çovdarovun sayəsində istintaqdan yaxa qurtara, cinayət işinin icraatına xitam verdirə bilib. Bu ilin iyulunda isə həmin cinayət işi təzələnib.  Bakı Şəhər Prokurorluğu Cinayət Məcəlləsinin 182.1-ci  maddəsi ilə istintaq edilən 1400902108 saylı cinayət işi üzrə bütün istintaq hərəkətləri aparılmaması əsası ilə Qabulov Polad Həsən oğlunun, Həsənov Mais Akif oğlunun, Rüstəmov İlham Tofiq oğlunun, birinin adı Xas olduğu göstərilməklə şəxsiyyətləri istintaqla müəyyən edilməyən 2 nəfərin və qeyrilərinin hərəkətlərində hədə-qorxu ilə tələb etmə, özbaşınalıq, dələduzluq, mənimsəmə, saxta sənəd hazırlamaqla ondan bilə-bilə istifadə etmə, məhkəmə qətnaməsini icra etməmə və digər cinayətlərin tərkib əlamətlərinin olub-olmamasının yoxlanılmasına qərar verib. Həmin qərarda xüsusi olaraq vurğulanıb ki, adı çəkilən hər bir şəxsin əməlinə konkret hüquqi qiymət verilmədiyindən icraata  xitam verilməsinə dair müstəntiq Elnur Abdullayevin qərarı qanunsuz va əsassız olub. Buna görə də qərar ləğv edilib. Cinayət Məcəlləsinin 182-ci(hədə-qorxu ilə tələb etmə) və 320(sənədləri saxtalaşdırma)maddələri ilə aparlan təzələnmiş cinayət işi çox maraqlı nüansların üzə çıxması ilə nəticələnib. Rüstəm Abdullayev istintaqa ifadəsində göstərib ki, 2011-ci il iyunun 25-də gecə yarısı onun evinə Polad Qabulovun başçılıq etdiyi dəstə soxulub.

Rüstəm Abdullayevlə ultimativ tonda danışan Polad Qabulov ondan şirkətinin inşa etdiyi binadan 10 mənzili sənədləşdirib ona verməsini tələb edib. Deyib ki, mənzilləri verməyəcəyi təqdirdə onun üçün çox pis olacaq. Bir general tanışı vasitəsi ilə Rüstəm Abdullayevin başına qara torba keçirtdirərək apartdıracaq. Polad Qabulov həmin basqın zamanı Akif Çovdarovun adını çəkməyib, amma Rüstəm Abdullayevə MTN-ə aparılacağını, orada bir general tanışın vasitəsi ilə itiriləcəyini, izinin-tozunun tapılmayacağını deyib. 2 milyon manat pulu ona pay-puş edə biləcəyini də Rüstəm Abdullayevə bildirən Polad Qabulov başının dəstəsi ilə tikinti şirkəti rəhbərinin mənzilini tərk edib. Səhər şərtlərdən birini yerinə yetirməyəcəyi təqdirdə itiriləcəyini də deməyi unutmayıb. O dövrdə R.Abdullayev nə edəcəyini düşünüb-daşınıb və çıxış yolu kimi ölkəni tərk edib.

Bir müddət sonra isə ölkəyə qayıdaraq baş verənlərlə bağlı şikayət edib. Lakin qeyd etdiyimiz kimi həmin vaxt Polad Qabulov himayəçisi Akif Çovdarovun sayəsində istintaq işinin qanunsuz və əsassız olaraq xitam olunmasına nail olub. Hazırda bu epizod üzrə çox ciddi araşdırmalar davam edir. Artıq Polad Qabulovun Akif Çovdarovun diqtəsi və təlimatı əsasında tikinti şirkəti rəhbərinin mənzilinə basqın etməsi də təsbit olunub.

Əldə etdiyimiz məlumata görə təzələnmiş istintaq zamanı mobil operatorlara sorğular verilib və məlum olub ki, Polad Qabulov Rüstəm Abdullayevin mənzilinə basqından əvvəl və sonra Akif Çovdarovla nə az, nə çox düz 19 dəfə əlaqə saxlayıb! “Akula Polad” özünün 050 303 00 16  telefon nömərsindən Akif Çovdarovun 050 210 60 12 nömrəsinə zəng etməklə üst-üstə 1 saata yaxın danışıblar. Bu çox ciddi faktdır və “Akula Polad”ın Rüstəm Abdullayevin mənzilinə basqın zamanı adını çəkmədiyi, MTN generalı kimi xitab etdiyi şəxsin məhz Akif Çovdarov olmasına dəlalət edən təkzibedilməz sübutdur.

Gecə yarısına qədər davam edən bu danışıqlar Rüstəm Abdullayevin əmlakının zorla əlindən alınması mövzusunu əhatə etməyib?

Əlbəttə ki, bu suallara cavabı Akif Çovdarov və bu gün Dubayda gizlənən Polad Qabulov verə bilərlər.

Akif Çovdarov həbsdədir və onun dindirilməsi elə də çətin deyil. Bəs Polad Qabulovu necə? Onu dindirmək, gizləndiyi Dubaydan gətirdib Akif Çovdarovla üzləşdirmək mümkün olacaqmı?

Yasamal prokuroru Polad Qabulov həbsi üçün təqdimat verdi…

Qaynağımız deyir ki, Yasamal rayon prokuroru Rasim Hacıyev 2016-cı il sentyabrın 10-da Polad Qabulovun həbsi ilə əlaqədar Yasamal Rayon Polis İdarəsinin İstintaq Şöbəsinin müstəntiqi Vüqar Əliyevin vəsatətinin təsdiqlənməsi üçün təqdimat yazıb. Rasim Hacıyev təqdimatı baxılması üçün Yasamal Rayon Məhkəməsinə yollayıb.

Sentyabrın 12-də məhkəmədə hakim Azər Tağıyevin sədrliyi ilə təqdimata baxılarkən məlum olub ki, Yasamal prokuroru Rasim Hacıyev təqdimatın ardınca bir məktub da yazaraq hakimə göndərib. Prokuror həmin məktubu ilə Polad Qabulovun barəsində təqdimata baxılmamasını hakimdən xahiş edib. Prokuror məktubunda bu hərəkətini əsaslandırmadığından anlaşılmaz vəziyyət yaranıb. Buna baxmayaraq hakim Rasim Hacıyevin məktubunda göstərdiyi xahişi nəzərə alıb və təqdimatı baxılmamış saxlayaraq Yasamal prokurorunun özünə göndərib. Rasim Hacıyevin 2 gün fərqlə yazdığı təqdimatla məktub arasında hansı əlaqələr gizləndiyi, prokurorun hansı nüanslardan çıxış etdiyi bilinmir.

Qaynağımız deyir ki, Yasamal Rayon Polis İdarəsinin İstintaq Şöbəsində aparılan istintaq zamanı o da müəyyən edilib ki, Akif Çovdarovla Polad Qabulovu Elşən Hüseynov tanış edib. Bu şəxsin adı “8-ci kilometr” bazarının zorla sahiblərindən alınmasında keçir.

Hazırda A.Çovdarova ittiham elan edilmiş epizodlardan 2-si xalq arasında “Vosmoy” bazarı kimi tanınan “8-ci kilometr” bazarının ərazisində fəaliyyət göstərən topdansatış bazarının (ərazisi 1,2 hektardır) sahibi olan Səfərov qardaşlarından alınması ilə əlaqədardır. Bu bazarı 2005-ci ildə Akif Çovdarovun şəxsən iştirakı ilə qəsb ediblər.

2005-ci il, dekabrın 20-də özünü Milli Təhlükəsizlik Nazirliyinin əməkdaşları kimi təqdim edən 3 nəfər Salman Səfərovun bazardakı ofisinə daxil olub. Onlar heç bir səbəb göstərmədən Salman Səfərovun qardaşı Qəhrəman Səfərovun və Akif adlı mühasibin qoluna qandal vuraraq özləri ilə aparıblar. Sonra Səfərovların digər qardaşı Cəfər Səfərova zəng vuraraq qardaşlarının saxlanıldığını deyiblər. Həmin vaxt MTN-də Akif Çovdarovun kabinetində olan Səfərovlara işgəncə verilirmiş. Əvvəlcə Səfərovlardan 500 min dollar tələb edən A.Çovdarov sonrdan  bazarı onların əlindən alıb və Qulu Cəfərov adlı öz tanışının adına rəmiləşdirib. Bundan sonra bazara Akif Çovdarovun yaxın qohumu Elşən Hüseynov nəzarət etməyə başlayıb.

Eldar Mahmudov vəzifəsindən qovulandan sonra bazarın sahibləri olan Cəfərov qardaşları istintaqa müraciət ediblər. Hazırda qardaşlar Akif Çovdarovun işində zərərçəkən kimi keçirlər. Maraqlıdır ki, “Akula Polad”ı Akif Çovdarovla tanış edən Elşən Hüseynov “8-ci kilometr” bazarı epizodu üzrə istintaqdan kənar qala bilib.