Heydər Əliyev adına Beynəlxalq Hava Limanından qanunsuz yolla qızıl-ziynət əşyaları keçirməkdə təqsirləndirilərək həbs edilən şəxslər aldıqları cəzadan narazı qalıblar. Onlar apellyasiya şikayəti veriblər.
Musavat.com xəbər verir ki, şikayətə Bakı Apellyasiya Məhkəməsində baxılıb. Həbs edilən şəxslərin cəzası azaldılıb.
Hakim Rizvan Səfərovun sədrliyi ilə keçirilən prosesdə qərar elan olunub.
Qərarda hər üç təqsirləndirilən şəxsin barəsində çıxarılmış hökmün dəyişdirildiyi və cəzaların azaldıldığı qeyd edilir.
Neman Abbasovun 9 il müddətinə azadlıqdan məhrumetmə cəzası 4 ilə, Adil Kazımovla Muxtat Qasımovun 8 il 6 aylıq cəzası 3 il 6 aya endirilib.
Qeyd edək ki, təqdirləndirilən şəxslərin cinayət işi üzrə məhkəmə prosesu Bakı Ağır Cinayətlər Məhkəməsində baş tutmuşdu.
Bu iş üzrə 6 nəfər təqsirləndirilirdi. Onlardan biri Türkmənistan vətəndaşı Baylıyev Amanmuhammed, Dövlət Gömrük Komitəsinin (DGK) Hava Nəqliyyatında Baş Gömrük İdarəsinin əməkdaşları Adil Kazımov, Aytəkin Tağıyeva, Muxtar Qasımov və qızıl alverçisi Ziyafət Qurbanova idi.
İttihama görə, DGK-nın inspektoru Neman Abbasov qabaqcadan digər şəxslərlə əlbir olaraq ümumi dəyəri 285 min manat olan qızıl-zinət əşyalarını qanunsuz yolla hava limanından keçirməyə cəhd ediblər.
İttiham aktında bildirilir ki, Neman Abbasov qızıl alverçisi Ziyafət Qurbanovadan qızılları təyyarəyə keçirmək üçün 2200 dollar rüşvət alıb. N.Abbasov digərləri ilə əlbir olaraq qızılları qanunsuz yolla hava limanı binasından keçirərək tualetdə Türkmənistan vətəndaşına vermək istəyiblər.
Bu iş üzrə təqsirləndirilən şəxslərdən ikisi – Neman Abbasov və Bayliyev Amanmuhammed həbs edilsə də digərləri zamində idi. Həbs edilənlərdən yalnız Neman Abbasov günahını etiraf edib. O, bu əməli ehtiyac üzündən etdiyini və digər şəxslərin bundan xəbərsiz olduğunu söyləmişdi.
Məhkəmənin hökmü ilə Türkmənistan vətəndaşı olan Aman Muhamməd Bayliyev məhkəmə zalından azadlığa buraxılmış, ona 1 il sınaq müddəti təyin edilməklə 6 il şərti cəzaya məhkum edilmişdi.
Gömrük Komitəsinin əməkdaşı olan Neman Abbasov 9 il müddətinə azadlıqdan məhrum edilib. Zamində olan komitə əməkdaşı, Neman Abbasovun rəisi olmuş Adil Kazımov məhkəmə zalında həbs edilmişdi. Digər komitə əməkdaşı Muxtar Qasımov da məhkəmə zalında həbs edilib və onların hər biri 8 il 6 ay müddətinə azadlıqdan məhrum ediliblər.
Dövlət Gömrük Komitəsinin əməkdaşı olan Aytəkin Tağıyeva və qızıl alverçisi Ziyafət Qurbanov da şərti cəza alımışdı.
Onlara Cinayət Məcəlləsinin 312-ci (rüşvət vermə) və 206-cı (qaçaqmalçılıq) maddələri ilə ittiham irəli sürülüb.
Son şərhlər