ABŞ Prezidenti Donald Tramp ən azı 1 milyon dollar ödəyə bilən varlı əcnəbilərə sürətləndirilmiş viza və vətəndaşlıq yolu təklif edən yeni bir proqram başlatdı.
Elchi.az xəbər verir ki, sosial mediada verdiyi açıqlamada Tramp kartın “ixtisaslı və təhlükəsizlik yoxlamasından keçmiş şəxslər üçün vətəndaşlığa birbaşa yol” təklif etdiyini bildirib və əlavə edib ki, “Böyük Amerika şirkətlərimiz nəhayət əvəzsiz istedadlarını qoruyub saxlaya biləcəklər”.
İlin əvvəlində elan edilən Tramp Qızıl Kartı, rəsmi veb saytına görə, ABŞ-a “əhəmiyyətli fayda” verəcəklərini sübut edə bilən şəxslərə veriləcək. Proqram Vaşinqtonun immiqrasiya nəzarətini sərtləşdirdiyi bir vaxta təsadüf edir. ABŞ administrasiyası iş vizası rüsumlarını artırıb və sənədsiz immiqrantların deportasiyasını sürətləndirib.
1 milyon dollarlıq sürətləndirilmiş oturum
Qızıl Kart proqramı ABŞ-da “rekord müddətdə” yaşayış icazəsi verəcəyinə söz verir. Veb saytdakı məlumata görə, 1 milyon dollarlıq ödəniş ərizəçinin ölkəyə əhəmiyyətli töhfə verəcəyinin sübutu hesab olunur. Bu proqram çərçivəsində işçilərini dəstəkləmək istəyən şirkətlər 2 milyon dollar ödəməlidirlər. Xüsusi vergi üstünlükləri təklif edən kartın “platin” versiyasının da tezliklə 5 milyon dollara satışa çıxarılacağı gözlənilir. Ərizəçilər həmçinin 15.000 dollar geri qaytarılmayan emal haqqı ödəməlidirlər. Bəzi hallarda ərizənin emalı üçün əlavə dövlət rüsumları tutula bilər.
Şayəstə
