Kanada 1990-cı illərdən bəri ilk dəfə Beynəlxalq Buzüstü Hokkey Federasiyasının (IIHF) Şurasında yer almayacaq.
Elchi.az xəbər verir ki, bu barədə “The Athletic” nəşri məlumat yayıb.
Kanada Hokkey Federasiyasının prezidenti Ketrin Henderson kifayət qədər səs toplaya bilməyib və IIHF Şurasının yeni tərkibinə seçilməyib.
Kanada sonuncu dəfə 1994-1998-ci illər arasında dünya hokkeyinin ali idarəetmə orqanında təmsil olunmayıb.
Adıçəkilən ölkə dünya buzüstü hokkeyinin aparıcı və ən titullu ölkələrindən biridir. Ölkənin milli komandası dünya çempionatlarında 28 dəfə qızıl medal qazanıb. Kanada həmçinin Olimpiya Oyunlarında 9 dəfə çempion olub, 5 dəfə gümüş və 3 dəfə bürünc medal əldə edib.
IIHF-nin yeni prezidenti almaniyalı Frans Rayndl seçilib. O, 2021-ci ildən federasiyaya rəhbərlik edən fransalı Lük Tardifi əvəz edib. Tardif yenidən prezidentliyə namizədliyini irəli sürməyib.
