Belçikada uzun müddət davam edən həddindən artıq isti və quraqlıq tərəvəz, meyvə və taxıl istehsalında, xüsusən də kartofda ciddi itkilərə səbəb olur, yem çatışmazlığı isə heyvandarlıq sektoruna mənfi təsir göstərir.
Elchi.az xəbər verir ki, Belçikanın “Le Soir” qəzetində dərc olunan xəbərə görə, ölkədə fövqəladə səviyyələrə çatan quraqlıq və temperatur kənd təsərrüfatı istehsalının bir çox sahəsində ciddi problemlərə səbəb olur.
Yaxın gələcəkdə hava şəraitində əhəmiyyətli dərəcədə yaxşılaşma gözlənilməsə də, kənd təsərrüfatı sektorunun nümayəndələri mövcud vəziyyəti bəzi məhsullar üçün “narahatedici” və “fəlakətli” adlandırırlar.
Quraqlığın ən nəzərə çarpan təsirləri kənd təsərrüfatı torpaqlarında müşahidə olunur və müxtəlif meyvə, tərəvəz və taxıl məhsulları üçün çox mənfi nəticələrə səbəb olur.
Yazda nisbətən əlverişli hava şəraitində yetişən taxıllar iyun ayının sonundakı həddindən artıq istidən və iyul ayında baş verən quraqlıqdan ciddi şəkildə zərər gördü.
Xüsusilə, vegetasiya mövsümündə kifayət qədər su almayan kartofda məhsul itkisinin hazırda 30 faiz civarında olduğu təxmin edilir. Önümüzdəki həftələrdə kifayət qədər yağış yağmasa, itkinin 50 faizə çata biləcəyi proqnozlaşdırılır.
Quraqlıq səbəbindən kartofun kifayət qədər ölçüyə çatmaması istehsalçılar üçün başqa bir risk yaradır.
Quraqlıq və həddindən artıq istilər xüsusilə yem qiymətlərinin artması ilə bağlı narahatlıq doğurur.
Qismən və ya tamamilə açıq havada yetişdirilən quşlar istilik və quraqlıq səbəbindən problemlər yaşayır. Həddindən artıq istilər toyuqlarda ölüm nisbətini artırır və ətin keyfiyyətinin aşağı düşməsinə səbəb olur. İstiliyin yaratdığı stress toyuqların yumurta istehsalına da mənfi təsir göstərir.
Ölkədə taxıl istehsalındakı itkilərin heyvan yeminin qiymətlərini artıracağı ilə bağlı narahatlıqlar da var.
Quraqlığın mal-qara təsərrüfatına təsiri xüsusilə yem çatışmazlığında özünü göstərir.
Adətən yay aylarını otlaqlarda keçirən heyvanlar otlaqların quruması səbəbindən qış dövrü üçün ayrılmış yemlə bəslənirlər.
Quraqlıq Avropanın böyük bir ərazisinə təsir etdiyindən, fermerlərin digər ölkələrdən yem almaq imkanları da məhduddur.
Qış aylarında bütün sürülərini bəsləməkdə problem yaşamaq ehtimalı ilə üzləşən bəzi yetişdiricilər heyvanlarını kəsimə göndərməyə başlayıblar.
Həddindən artıq istilərin yaratdığı stress süd verən inəklərə də ciddi təsir göstərir və süd məhsuldarlığının 30-40 faiz azalmasına səbəb olur.
Şayəstə
