“Cockroach Janta Party” (CJP) gənclər hərəkatının Hindistan parlamentinə yürüşü zamanı baş verən iğtişaşlar nəticəsində 118 polis və 60-a yaxın etirazçı xəsarət alıb.
Elchi.az “India Today”ə istinadən xəbər verir ki, bu barədə paytaxt polisi məlumat yayıb.
Qeyd olunub ki, xəsarət alanlar arasında elit IPS (Indian Police Service) polisinin beşdən çox zabiti də var.
“Etirazçılar aqressiv davranıb, zorakılığa əl atıblar. İki polis avtobusuna hücum edilib, Canpat prospektindəki mağazalar talan olunub, nümayişçilər polis əməkdaşlarına daş və digər əşyalar atıb, genişmiqyaslı zorakılıq hərəkətlərinə yol veriblər. Talanlar nəticəsində 15-20 dövlət nəqliyyat vasitəsinə ziyan dəyib. Nümayişin dağıdılması cəhdi polislə toqquşmalara gətirib çıxarıb. Operativ tədbirlər nəticəsində 70-dən çox şəxs saxlanılıb”, – məlumatda qeyd edilir.
Polisdən bildirilib ki, qanunazidd hərəkətlərdə və zorakılıqda iştirak edən bütün şəxslərə qarşı sərt tədbirlər görüləcək.
Qeyd olunub ki, yürüşlər və etiraz aksiyaları bütün Maharaştra ştatında keçirilir, hakimiyyətin hərəkat liderləri ilə danışıqları isə nəticəsiz başa çatıb. İyulun 20-si səhər saatlarında Dehli polisi “Chalo Sansad” (“Parlamentə yürüş”) aksiyasının iştirakçılarına qarşı dəyənək və gözyaşardıcı qaz tətbiq edib. Aksiya imtahan materiallarının sızması və tibb imtahanının təxirə salınması ilə bağlı qalmaqaldan sonra CJP hərəkatı tərəfindən keçirilir. Təşkilatçıların sözlərinə görə, aksiya 40 min fəalı birləşdirib.
