Nyu-Deli məhkəməsi “Telegram”ın Hindistanda xidmətin müvəqqəti bloklanması ilə bağlı verdiyi apellyasiya şikayətini rədd edib və hakimiyyət orqanlarının platformanın fəaliyyətinin iyunun 22-nə qədər qadağan edilməsi barədə qərarını qüvvədə saxlayıb.
Elchi.az xəbər verir ki, bu barədə “Reuters” agentliyi məlumat yayıb.
Məhdudiyyətlər Hindistanın İnformasiya Texnologiyaları Nazirliyi tərəfindən qarşıdan gələn ümummilli tibb ixtisası üzrə qəbul imtahanı ətrafında mümkün fırıldaqçılıq sxemləri ilə bağlı narahatlıqlar fonunda tətbiq edilib. Hakimiyyət orqanları bəyan ediblər ki, “Telegram”da imtahan suallarının sızdırılmış variantlarını pulla təklif edən kanallar yayılıb.
Deli Ali Məhkəməsinin hakimi Tecas Karia hökumətin qərarının əsaslı olduğunu və qanunla müəyyən edilmiş prosedurlara uyğun qəbul edildiyini hökm edib.
Qadağa ölkədə “Telegram” serverlərinin söndürülməsinə və tətbiqin “Google” və “Apple” mağazalarından silinməsinə səbəb olub.
Hindistan “Telegram” üçün ən böyük bazar olaraq qalır — ölkədə platformanın istifadəçilərinin sayı 150 milyondan çoxdur. Şirkətin məlumatına görə, “Telegram” daha əvvəl imtahan suallarının sızması ilə bağlı kontent ehtiva edən 900-dən çox linki silib.
Məryəm
