“Azərbaycanda mənzil maliyyələşməsi fondunun aktivləri 2 milyard dolları ötüb”.
Elchi.az xəbər verir ki, bunu WUF13 çərçivəsində keçirilən “Mənzil Maliyyələşdirməsi üçün Yeni Bir Saziş” sessiyasında Azərbaycanın maliyyə nazirinin birinci müavini Anar Kərimov deyib.
O bildirib ki, Azərbaycanın mənzil maliyyələşməsi modeli dövlət dəstəyi ilə kapital bazarı maliyyəsini birləşdirir.
Anar Kərimov qeyd edib ki, hazırda Azərbaycan Respublikasının İpoteka və Kredit Zəmanət Fondunun idarə etdiyi aktivlərin həcmi 2 milyard ABŞ dollarını ötür. Onun sözlərinə görə, model çərçivəsində bir tərəfdən həssas qruplar üçün güzəştli ipoteka kreditləri təqdim olunur, digər tərəfdən isə daxili kapital bazarında istiqraz emissiyası həyata keçirilir.
Maliyyə nazirinin birinci müavini vurğulayıb ki, güzəştli mənzil proqramları qaçqınlar, məcburi köçkünlər, hərbi qulluqçular, müəllimlər və şəhid ailələri üçün nəzərdə tutulub.
Anar Kərimov bildirib ki, mənzil sektorunda rəqəmsallaşma da əsas prioritetlərdəndir və müraciət, yoxlama və təsdiq prosesləri tam elektronlaşdırılıb.
O qeyd edib ki, Azərbaycanın işğaldan azad edilmiş ərazilərində həyata keçirilən “Böyük Qayıdış” proqramı çərçivəsində 2020-ci ildən bəri yenidənqurma və məskunlaşma məqsədilə 10 milyard ABŞ dollarından çox vəsait ayrılıb.
